"ბინათმშენებლობების კოოპერატივებით დაზარალებული მოსახლეობის კომპენსირებისთვის დიდ დიღომში 2 ნაკვეთი გამოიყოფა"

"ბინათმშენებლობების კოოპერატივებით დაზარალებული მოსახლეობის კომპენსირებისთვის დიდ დიღომში 2 ნაკვეთი გამოიყოფა" - კალაძე

პოლიტიკა - 14:58, 06 Jun, 2018

1124

დედაქალაქის მერის კახა კალაძის განცხადებით, ბინათმშენებლობების კოოპერატივებით დაზარალებული მოსახლეობის დაკმაყოფილებისთვის საწყის ეტაპზე დიდ დიღომში ორი მიწის ნაკვეთი გამოიყოფა, რაზეც მერია ინტერესთა გამოხატვას აცხადებს. ამის შესახებ კახა კალაძემ დედაქალაქის მთავრობის დღევანდელ სხდომაზე ისაუბრა.

მისი ინფორმაციით, ჯამში 3 500 ადამიანია დაზარალებული, ამ ეტაპზე კი 90-ზე მეტი ოჯახის კომპენსირება მოხდება.

„დღეს მინდა მთავრობის სხდომაზე განსახილველად წარმოვადგინო და გადაწყვეტილება მივიღოთ კონკრეტულ ორ ლოკაციაზე ინტერესთა გამოხატვის გამოცხადების თაობაზე. ეს მდებარეობებია დიდი დიღმის მეოთხე მიკრორაიონის 25-ე კორპუსის მიმდებარედ ორი მიწის ნაკვეთი, რომლებიც ჯამში დაახლოებით 2 ჰექტარია და ჩვენი ეკონომიკური სამსახურის მიერ მომზადებული გაანგარიშების საფუძველზე, ამ ეტაპზე შესაძლებელი გახდება დაახლოებით 90-ზე მეტი ოჯახის დაკმაყოფილება. ეს ის ოჯახებია, რომლებიც 90-იან წლებში სახელმწიფოს მიერ დაზარალდნენ და ეს ყველაფერი აღიარებულია“, - განაცხადა კახი კალაძემ.

დედაქალაქის მერმა სამშენებლო და დეველოპერულ კომპანიებს მოუწოდა, რომ დაინტერესდნენ წარმოდგენილი პროექტით, იქონიონ კომუნიკაცია მერიის ეკონომიკური განვითარების სამსახურთან და მონაწილეობა მიიღონ მერიის მიერ გამოცხადებულ ინტერესთა გამოხატვაში.

ამასთან, კახა კალაძის განცხადებით, ბინათმშენებლობების კოოპერატივებით დაზარალებული მოსახლეობის კომპენსირება მომდევნო 3-4 წლის განმავლობაში გაგრძელდება და ყველა დაზარალებული ბინით დაკმაყოფილდება.

„ჩვენ ვაგრძელებთ მუშაობას შემდგომ პროექტებზე. უახლოეს პერიოდში წარმოვადგენთ კიდევ ახალ პროექტებს და გამოვაცხადებთ ინტერესთა გამოხატვას. საბოლოო ჯამში, ჩვენი მიზანია, რომ 3-4 წლის განმავლობაში, მთლიანად მოვაგვარო და მოვაწესირგოთ ეს პრობლემა და ყველა ოჯახი და ადამიანი დავაკმაყოფილოთ“, - განაცხადა დედაქალაქის მერმა.