"წულუკიანს მორალური უფლება არ აქვს, რომ კიდევ ერთი მთავარი პროკურორი შეარჩიოს"- NGO-ები იუსტიციის მინისტრის წინააღმდეგ

პოლიტიკა - 14:04, 05 Jun, 2018

1204

მესამე სექტორი მთავრობას იუსტიციის მინისტრის გადაყენებისკენ მოუწოდებს. „სამართლიანი არჩევნებისა და დემოკრატიის საერთაშორისო საზოგადოების“ ხელმძღვანელი, მიხეილ ბენიძე თვლის, რომ იუსტიციის მოქმედ მინისტრს აღარ აქვს მორალური უფლება, "კიდევ ერთი მთავარი პროკურორი შეარჩიოს იმიტომ, რომ არცერთი წინა პროცესი არ დასრულდა პოზიტიურად".
როგორც არასამთავრობო სექტორის წარმომადგენელთა მიერ ერთობლივად გამართულ პრესკომფერენციაზე ბენიძემ განაცხადა, იუსტიციის მინისტრი არ არის იმ მოვლენების ადეკვატური, რაც დღეს ქვეყანაში ვითარდება.

„იმ ფონზე, როდესაც საზოგადოების სრული კონსენსუსი არსებობს მთავარი პროკურორის მიმართ უნდობლობაზე და გადადგა ეს ადამიანი, ქალბატონი თეა წულუკიანი კვლავაც მადლობას უხდიდა მას გაწეული საქმიანობისთვის. ის ადეკვატურად ვერ აფასებდა იმ გამოწვევებს, რაც პროკურატურასა და მთლიანად მართმსაჯულების სისტემაში არსებობს. გარდა ამისა, მართმსაჯულების რეფორმის მეოთხე ტალღაზე იუსტიციის სამინისტროს მხრიდან ინიციატივა საერთოდ არ ყოფილა. როგორც ჩანს, იუსტიციის სამინისტროს მიაჩნია, რომ რეფორმების კუთხით მეტი ნაბიჯი გადასადგმელი არ არის. ამ პროცესში, მოქმედ მინისტრს აღარ აქვს მორალური უფლება, რომ კიდევ ერთი მთავარი პროკურორი შეარჩიოს იმიტომ, რომ არცერთი წინა პროცესი არ დასრულდა პოზიტიურად“, - განაცხადა მიხეილ ბენიძემ.