შვილმოკლული მამებისა და მათი ადვიოკატების პრემიერთან შეხვედრას სახალხო დამცველიც ესწრებოდა. ნინო ლომჯარია დაესწრო როგორც გიორგი კვირიკაშვილისა და მალხაზ მაჩალიკაშვილის შეხვედრას ასევე ხორავაზე მოკლული მოზარდების მამებთან გამართულ შეხვედრასაც. ომბუდსმენის შეფასებით შეხვედრებმა სამუშაო რეჟიმში კონსტრუქციულად ჩაიარა:

„ვესწრებოდი სამივე შეხვედრას. ვიცნობ ძალიან კარგად სამივე საქმეს. სამივე შემთხვევაში როგორც გარდაცვლილების ოჯახის წევრებს ასევე მათ ადვოკატებს და მეც მომეცა შესაძლებლობა მესაუბრა იმ გარემოებებზე რაც არის საეჭვო აღნიშნულ საქმეებში. რასთან დაკავშირებითაც გამოძიებასთან კითხვის ნიშნები არსებობს და რაც საჭიროებს დროულად პასუხის გაცემას. ნამდვილად სამუშაო რეჟიმში, კონსტრუქციულად მიმდინარეობდა შეხვედრები და ვფიქრობ, რომ ყველა მნიშვნელოვანი აქცენტი გაკეთდა,“- განაცხადა ლომჯარიამ.

ლომჯარიამ განსაკუთრებული აქცენტი სარალიძის და მაჩალიკაშვილის საქმეებზე გააკეთა:

„სარალიძის შემთხვევაში მამამაც და მისმა ადვოკატმაც საკმაოდ დეტალურად ისაუბრა, ყველა გარემოებაზე და ნიუანსზე, რაშიც მეც ვიღებდი მონაწილეობას. კომკრეტული ვადები არ ყოფილა, იყო საუბარი იმაზე, რას აკეთებს ახლა გამოძიება. ჩვენ ვსწავლობთ საქმის მასალას, ზაზა სარალიძეს შევთავაზე, რომ მის ადვოკატებთან ერთად შევისწავლით, უმჯობესია რომ კოორდიანაციაში ვიყოთ.“- განაცხადა ომბუდსმენმა

კონკრეტულ ვადებთან დაკავშირებით ნინო ლომჯარიას თქმით, შსს-მ უნდა ისაუბროს:

„შსს უნდა გასცეს პასუხი, მე მაქვს მოლოდინი, რომ იქნება გარკვეული სიახლეები გამოძიებასთან დაკავშირებით, პრემიერმა ჩაინიშნა ყველა გარემოება, რაც დააყენეს სამივე შეხვედრაზე, განსაკუთრებით მაჩალიკაშვილისა და სარალიძის საქმეებთან დაკავშირებით არებობს კითხვის ნიშნები. პრემიერის გადადგომასთან დაკავშირებით არ ყოფილა საუბარი თუმცა ბატონი ზაზა უნდობლობას უცხადებდა გამოძიებას. შედეგებს დავინახავთ უახლოეს დღეებში, მზაობას აცხადებენ და რამდენად ეფექტურია ვნახავთ.“- განაცხადა ნინო ლომჯარიამ.