"ეს გამოძიება აღარ არსებობს, თუ არ მისცეს პასუხისგებაში ისინი, ვინც საქმის გაყალბების ბრძანება გასცა და ვინც გააყალბა"- ზაზა სარალიძე პრემიერთან შეხვედრის შემდეგ

პოლიტიკა - 18:38, 04 Jun, 2018

1927

ზაზა სარალიძის განცხადებით, საქმის თავიდან გამოძიება შეუძლებელია, რადგან მოწმეები და ნივთმტკიცებები არ არსებობს. აღნიშნული განცხადება ზაზა სარალიძემ „ნიუპოსტის“ კორესპონდენტის კითხვის საპასუხოდ გააკეთა, რომელიც გამოძიების თავიდან დაწყების სანდოობას შეეხებოდა.

ზაზა სარალიძის თქმით. საქმის რეალური დამნაშავეების გამოვლენა ბოლოდან უნდა დაიწყოს, ანუ იმ პირებიდან, რომლებმაც დანაშაულის დაფარვას და გაყალბებას შეუწყეს ხელი. ზაზა სარალიძე აღნიშნულ საქმეზე კონკრეტული ნაბიჯების გადადგმას 10 ივნისამდე ელოდება.

„ეს გამოძიება აღარ არსებობს. თუ არ მისცეს პასუხისგებაში გამომძიებლები და პროკურორები, ვინ რა გააფუჭა. აქ მოწმეები და ნივთმტკიცებები არ არსებობს. მანქანა ჩიხში შევიდა, აღარაა მოსაბრუნებელი? უნდა დაიწყოს უკანსვლა. ვინ გასცა ბრძანება რომ ეს საქმე გაყალბებულიყო, ვინ უწყობდა ხელს ამ საქმის გაყალბებას, თუნდაც კონკრეტულად პროკურორები ფხაკაძე და გუგუშვილი, რომლებიც 6 თვეა შეურაცხყოფას მაყენებენ. თუნდაც გენერალური პროკურორი, რომელიც გამოდიოდა და რაღაცეებს იგონებდა, თუნდაც მალხაზ კაპანაძე, ქალაქის პროკურორი რომ გამოვიდა და განაცხადა, რომ ბრალდებულები 6 თვეა დუმილის უფლებას იყენებენო და ერთი ბრალდებულის ჩვენება პირდაპირ გამოვიკვლიე. კონკრეტულ ნაბიჯებს ველოდები. აქ ვერაფერი ვერ გამოიკვეთება, მოწმემ რომელმაც ჩვენება მისცა და სასამართლომ ეს ჩვენება ჩათვალა სწორად. დღეს ახლა რომ ჩვენება შეცვალოს, პირდაპირ პასუხისგებაშია მისაცემი. რომელ გამოძიებაზეა საუბარი.“- განაცხადა ზაზა სარალიძემ.