ცოტნე გამსახურდია - სიკვდილის შემდეგ პომპეზური ღონისძიებები და პატივგება დიდ რამედ არ მიმაჩნია

საზოგადოება - 17:59, 15 Aug, 2013

755

"მივესალმები ამ ინიციატივას და მიმაჩნია, რომ ეს ყველაფერი პირველ რიგში საზოგადოებისათვის არის აუცილებელი, რომ სწორად შეაფასოს წარსული და ყველაფერს თავის სახელი დაარქვას. ეს არც მის ოჯახს სჭირდება და მით უმეტეს, არც მიცვალებულს. ასევე, ეს სწორ გზას და მიმართულებას აჩვენებს მომავალ თაობებს.

პირადად მე სიკვდილის შემდეგ პომპეზური ღონისძიებები და პატივგება დიდ რამედ არ მიმაჩნია. სხვათა შორის, ასე ფიქრობდა გარდაცვლილიც...გაგიკვირდებათ და მისი გადმოსვენების დროს ჩემთვის სულ ერთი იყო, სად დაასაფლავებდნენ და ამის შესახებ ვუთხარი კიდეც პატრიარქს: განა ადამიანის ღვაწლი მხოლოდ მემორიალებით ფასდება? რამდენი ღირსეული ადამიანის და გმირის არათუ საფლავი, სახელიც არ ვიცით!.არ მგონია, რომ მათ ამით დააკლდათ რამე...

ამ ყველაფრიდან გამომდინარე ვთვლი, რომ გაცილებით მნიშვნელოვანი იქნება იმდროინდელი მოვლენების ობიექტური და მიუკერძოებელი შეფასება. რათა კარგსა და ცუდს სახელი დაერქვას და გაიგოს საზოგადოებამ, განსაკუთრებით ახალგაზრდობამ, ვის რა წვლილი მიუძღვის ისტორიაში.

შეფასებაში აბსოლუტურად არ ვგულისხმობ თუნდაც მამაჩემის აპოლოგიას ან რაღაც ცალმხრივ რიტორიკას. დაე, საზოგადოებრივმა კომისიამ დაადგინოს, რა იყო მისი ეპოქალური მიღწევა თუ შეცდომა, რა გააკეთა და რა - ვერ შეძლო.
ეს არ ნიშნავს არც კუდიანებზე ნადირობას და არც მოწინააღმდეგეების დაგმობას. არაა აუცილებელი ვინმეს ყველაფერში ეთანხმებოდე, მით უმეტეს, ხელისუფალს. მე არაერთი მეგობარი მყავს, რომლებიც განსხვავებულ პოზიციებზე იდგნენ იმ დროს ან სულაც კრიტიკულები იყვნენ მამაჩემის მიმართ. განსხვავებული აზრი - ადამიანის ძირითადი უფლებაა და არაფერი ამართლებს მის შეზღუდვას! მაგრამ ერთია, როცა ეს ადამიანი ამ აზრს ცივილიზებულად და არგუმენტირებულად გამოხატავს და მეორე, როცა ძალადობით და არაადამიანობით ამკვიდრებს თავის ხედვას, რომლის უკანაც ხშირად უცხო ქვეყნის სპეცსამსახურებთან თანამშრომლობა და ანგარება დგას.

მოკლედ, განსხვავებული, თუნდაც მცდარი აზრი არ უნდა გახდეს ადამიანის დაგმობის და განკითხვის საფუძველი. მაგრამ, აბსურდია, როცა ერთის მხრივ ესოდენ პატივს მიაგებ ზვიად გამსახურდიას, მერაბ კოსტავას, და ამავე დროს პერიოდულად ნაძირალა სიგუა და კიტოვანი გვმოძღვრავენ საინფორმაციო საშუალებებით, სხვებზე რომ აღარაფერი ვთქვათ. ასე ალბათ მხოლოდ ჩვენში შეიძლება მოხდეს: აქ ხომ არასდროს არსებობდა მკაფიო მორალური კრიტერიუმები და ორიენტირები! აქ ხომ ყველა ყველას აგინებს, მაგრამ ყველა ყველას "ახლობელია"; აქ ხომ ცუდი კარგია და კარგი ცუდი, გააჩნია საქმეს როგორ სჭირდება; აქ ხომ "...и нашим, и вашим"...

პასუხი უნდა მოეთხოვოს ყველას, ვისაც კონკრეტული ადამიანების ჯანმრთელობის , სიცოცხლის, საკუთრების და ქვეყნის ინტერესების წინააღმდეგ მიუძღვის შეგნებული, მძიმე დანაშაული. სხვანაირად, ამ ქვეყნის განვითარება წარმოუდგენელია!" - აცხადებს ცოტნე გამსახურდია.