21 მაისს ქუთაისში, დასავლეთ საქართველოს მასშტაბით ყველაზე დიდ და თანამედროვედ აღჭურვილ ონკოლოგიის ცენტრს სხივური თერაპიის მიმართულებით ჩიკაგოდან მოწვეული რადიოლოგი კრისტინა კილი ეწვევა.

ამერიკაში მოღვაწე სხივური თერაპევტი კრისტინა კილი ქუთაისის ონკოლოგიის ცენტრს სამუშაო ვიზიტით პერიოდულად სტუმრობს. 21 მაისიდან 3 კვირის განმავლობაში კრისტინა კილი ქართველ ონკოლოგებთან და რადიოლოგებთან ერთად გაეცნობა ყველა იმ რთული ონკოლოგიური პაციენტის ისტორიას, რომელებიც მკურნალობის კურსს გადიან.

ვიზიტის ფარგლებში ნებისმიერ ონკოლოგიურ პაციენტს საშუალება ექნება მიმართოს ონკოლოგიის ცენტრს და ჩვენების მიხედვით ჩაიტაროს შესაბამისი კვლევები და მკურნალობა ადგილობრივი ონკოლოგებთან ერთად.

ქუთაისის ონკოლოგიის ცენტრი ერთადერთი სამედიცინო დაწესებულებაა იმერეთის რეგიონში, სადაც 2015 წლიდან ფუნქციონირებს ხაზოვანი ამაჩქარებელი აპარატი, 2017 წელს კი ცენტრმა დააინსტალირა კიდევ ერთი უახლესი ხაზოვანი ამაჩქარებელი Truebeam-ი, რომელიც რთულად მისადგომ სიმსივნურად დაზიანებულ უბნებში მიზნობრივ დასხივებას ახორციელებს.

ცენტრში პაციენტებს ონკოლოგიური დაავადებების მკურნალობის კურსს ზედამხედველობას ევროპასა და ამერიკაში მოღვაწე ქართველი და უცხოელი ექიმები უწევენ: ქრისტინა კილი - სხივური თერაპიის მიმართულებით ჩიკაგოდან მოწვეული რადიოლოგი, ზაზა უჯმაჯურიძე - დანიაშნი მოღვაწე ონკოლოგი, გოჩა ხელაშვილი - ჩიკაგოში მოღვაწე სხივური თერაპიის სამედიცინო ფიზიკოსი, აიდა გოზალოვა - გერმანიიდან მოწვეული ონკო-ჰემატოლოგი.