რაზე ისაუბრეს მაკრონმა და პუტინმა - შეხვედრა სანკტ პეტერბურგში

მსოფლიო - 14:36, 25 May, 2018

2532

პეტერბურგის საერთაშორისო ეკონომიკური ფორუმის ფარგლებში საფრანგეთის პრეზიდენტი რუსეთის პრეზიდენტ ვლადიმირ პუტინს შეხვდა. მაკრონმა და პუტინმა განიხილეს როგორც ორმხრივი საკითხები, ასევე საერთაშორისო პრობლემების ფართო სპექტრი, მათ შორის ირანთან ბირთვული შეთანხმება, სირიის კონფლიქტი, ჩრდილო კორეისა და აშშ-ის დილოგი. საფრანგეთის და რუსეთის პრეზიდენტებმა აღმოსავლეთ უკრაინაში არსებულ სიტუაციაზეც ისაუბრეს, რა დროსაც პუტინმა აღნიშნა, რომ უკრაინის ხელისუფლება კონფლიქტის მოგვარებას არ ცდილობს. ამასთანავე მაკრონმა და პუტინმა მოილაპარაკეს იმის შესახებ, რომ აუცილებელია შეიქმნას კიბერსივრცისთვის საერთო რეგლამენტი.

მოლაპარაკებების დაწყებამდე რუსეთის ლიდერი მიესალმა თავის ფრანგ კოლეგას და მადლობა გადაუხადა, მოწვევის მიღებისთვის და იმისთვის, რომ სანკტ-პეტერბურგის საერთაშორისო ფორუმზე საფრანგეთის დელეგაციას სწორედ ის ხელმძღვანელობს.

თავის მხრივ საფრანგეთის ლიდერმა მადლობა გადაუხადა პუტინს, „შენობით“ მიმართა და გამოთვა იმედი, რომ მოსკოვი და პარიზი ერთობლივი ინიციატივების განხორციელებისთვის ერთად მუშაობას შეძლებენ.

მოლაპარაკებების ერთ-ერთი მთავარი საკითხი ირანის ბირთვული შეთანხმება იყო, ორივე ქვეყნის ლიდერი თანხმდება, რომ ირანთან შეთანხმება უნდა გაგრძელდეს, თუმცა პუტინი მაკრონისგან განსხვავებით თვლის, რომ შეთანხმება უცვლელად უნდა დარჩეს, მაკრონს კი მიაჩნია რომ შეთანხმება უნდა გაფართოვდეს და უფრო მეტი საკითხი უნდა მოიცვას.

სირიის საკითხთან დაკავშირებით, საფრანგეთის ლიდერმა განაცხადა, რომ დადგა დრო იმისთვის, რათა კონფლიქტის მოგვარებაში დაინტერესებული ყველა ქვეყანა მოლაპარაკების მაგიდას მიუჯდეს და პრობლემის რეალური პოლიტიკური მოგვარების გზები იპოვონ.

მაკრონმა და პუტინმა წუხილი გამოთქვეს იმის გამო რომ აშშ-ის და ჩრდილო კორეის ლიდერის შეხვედრა გაუქმდა და იმედი გამოთქვეს, რომ ეს შეხვედრა შედგება.