27-დღიანი კომიდან გამოსვლის შემდეგ , ყოფილი რუსი ორმაგი აგენტის სერგეი სკრიპალის შვილმა , იულია სკრიპალმა სააგენტო Reuters-ს პირველი ინტერვიუ მისცა.

იულიას თქმით, ის და მამამისი იღბლიანები აღმოჩნდნე, რადგან გადარჩნენ. მათი გამოჯანმრთელების პროცესი ნელი და მტკივნეული იყო.

როგორც იულია სკრიპალმა აღნიშნა, ის ახლა მამას ეხმარება, რომელიც ცოტა ხნის წინ გაწერეს საავადმყოფოდან. იული აღნიშნავს, რომ იმედი აქვს, ოდესმე რუსეთში დაბრუნდება.

რუსეთს კი იულია სკრიპალის განცხადების არ სჯერა.

დიდ ბრიტანეთში რუსეთის საელჩო აცხადებს, რომ იულიას განცხადება უცნაურია და მასთან პირადად შეხვედრას ითხოვს.

"ნაჩვენები ვიდეორგოლი კიდევ უფრო ამძაფრებს ჩვენს შეშფოთებას იმ პირობებზე, რომელშიც იულია სკრიპალი იმყოფება. სრულიად ნათელია, რომ ის წინასწარ დაწერილ ტექტს კითხულობდა, მეტიც, ეს იყო თარგმანი ინგლისური ენიდან"- ნათქვამია საელჩოს განცხადებაში.

შეგახსენებთ, დიდი ბრიტანეთის ქალაქ სოლსბერიში, ყოფილი რუსი ორმაგი აგენტი 66 წლის სერგეი სკრიპალი და მისი 33 წლის შვილი იულია, 4 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი რამდენიმე კვირა კომატოზურ მდგომარეობაში იმყოფებოდა. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."

ცნობილი გახდა ისიც, რომ სპეციალისტებმა ნერვულ-პარალიტიკური ნივთიერება სკრიპალების სახლში აღმოაჩინეს. გავრცელდა ვერსია, რომ სკრიპალები სახლის კარის საკეტზე წასმული "ნოვიჩოკით"მოიწამლნენ. მეორე ვერსიით, "ნოვიჩოკს" სკრიპალებისთვის რუსეთიდან ჩატანილი წიწიბურა შეიცავდა.

რუსეთის დაზვერვის ყოფილი თანამშრომლის მოწამვლის საქმეზე ლონდონმა მოსკოვიდან ახსნა-განმარტებები მოითხოვა და 24 საათიანი ვადა მისცა მოსკოვს , თუმცა პასუხი ვერ მიიღო. შედეგად კი ბრიტანეთმა მოსკოვს სანქციები დაუწესა.

ბრიტანეთმა რუსეთის უმაღლეს ხელისუფლებასთან ყველა დონის ურთიერთობა გაწყვიტა და ქვეყნიდან 23 რუსი დიპლომატი გააძევა. ბრიტანეთის მხარდასაჭერად მსოფლიოს 28 ქვეყნიდან , მათ შორის საქართველოდან, საერთო ჯამში 150 რუსი დიპლომატი გააძევს.