სამეგრელოში რეგისტრირებული მსხვილი მეწარმე, რომელიც "ნიუპოსტს" პირადად დაუკავშირდა, ამბობს, რომ უბნის რწმუნებული დაუკავშირდა და უთხრა, რომ პოლიციაში აუცილებლად უნდა გამოცხადებულიყო, ხოლო პოლიციაში გამოცხადების შემდეგ მას ე.წ. "ღამის გამცილებლების" სახით პოლიციელთა ჯგუფის გამოყოფა შესთავაზეს, რომლებიც შესყიდული ნედლეულის (მეწარმის იდენტიფიცირების თავიდან არიდების მიზნით ნედლეულის სახეობას რედაქცია არ ასახელებს) უსაფრთხო გადატანას უზრუნველყოფდნენ:

"მითხრეს, რომ მარშრუტი წინასწარ შემეთანხმებინა და მეცნობებინა, ხოლო იმ დროს, როცა დიდი რაოდენობის ნედლეულის შესასყიდად ან ტრანსპორტირებისთვის წავიდოდით, პოლიციელთა ჯგუფს გამომაყოლებდნენ, რომელიც ჩვენს უსაფრთხოებას დაიცავდა წინა და უკანა გზაზე", - უთხრა "ნიუპოსტს" მსხვილმა მეწარმემ.

შეგახსენებთ, რომ სამეგრელოში მოქმედი მსხვილი დამამზადებლები სხვადასხვა სოფლებში, მოსახლეობისგან ნედლეულის შესასყიდად ადგილზე გადიან და თანხას ნაღდი ფულის სახით იხდიან. უმეტეს შემთხვევაში, ნედლეულით დატვირთული მანქანები ქარხანაში ან საამქროში ღამის საათებში ბრუნდებიან. როგორც მეწარმე ამბობს, არც პირადად მას, არც მის სფეროში დასაქმებულ სხვა მეწარმეებს ბოლო 9 წლის განმავლობაში არც პრობლემა შექმნიათ და არც დამატებით უსაფრთხოებაზე უფიქრიათ:

"ყველაზე საინტერესო ის იყო, რომ პოლიციაში, როცა ამ შემოთავაზების შემდეგ ჩემი გაკვირვებული სახე დაინახეს, დამნაშავესავით მითხრეს: "რა ვქნათ, ამდენი ქურდი და ავაზაკი გამოუშვეს ციხიდან", - ამბობს მეწარმე.

შეგახსენებთ, რომ ე.წ. ღამის გამცილებლის ინსტიტუტი, ანუ "კრიშა" ედუარდ შევარდნაძის დროინდელ პოლიციაში გავრცელებული "მომსახურება" იყო, რომლის შეძენა მეწარმეს საკმაოდ ძვირი უჯდებოდა.

ამის მიუხედავად, ხშირი იყო ყაჩაღობის იმიტაციაც, როცა რამდენიმე თავდამსხმელი, რომელმაც პოლიციელებისგან წინასწარ იცოდა მარშრუტიც და იმ თანხის სავარაუდო ოდენობაც, რომელიც იმ დროისთვის მეწარმეს ჰქონდა, თავდასხმის ინსცენირების შედეგად იარაღს "ართმევდა" პოლიციელებს, მეწარმეების კუთვნილ თანხას იტაცებდა და უჩინარდებოდა.

ხშირი იყო დაჭრისა და მკვლელობის ფაქტებიც. როგორც წესი, ამგვარ დანაშაულთა უმრავლესობა გაუხსნელი რჩებოდა.