"დათოს მკვლელობაში 4 პირი ფიგურირებს, თუ კალანდიას დაიჭერენ, ყველაფერი გაირკვევა"- მოზარდების საქმის სკანდალური გაგრძელება

პოზიცია - 13:02, 21 May, 2018

3291

მოზარდების მკვლელობის სკანდალური დეტალები - მოკლული დავით სარალიძის მამა, ზაზა სარალიძე „ნიუპოსტთან“ ამბობს, რომ სასტიკ მკვლელობაში ბრალდებულმა ერთ-ერთმა პირმა 17 მაისის სასამართლოზე სკანდალური განცხადება გააკეთა და თქვა, რომ მკვლელობაში კიდევ ორი პირი მონაწილეობდა.

„მიუხედავად ბრალდებულის ამ განცხადებისა, ის ორი პირი ვისაც ხელი დაადო და თქვა, რომ ისინიც მონაწილეობდნენ მკვლელობაში პოლიციას ამ დრომდე არ დაუკავებია. ბრალდებულის მონაყოლის მიხზედვით, ჩემს შვილს 4-მა პირმა მიაყენა ჭრილობები. დაასახელა მიხეილ კალანდია და კიდევ ერთი არასრულწლოვანი („ნიუპოსტი“ აღნიშნული მოზარდის ვინაობის დასახელებისგან თავს იკავებს). ანუ გამოდის, რომ მკვლელობაში მონაწილე კიდევ ორი პირი დღეს თავისუფალია“ - განაცხადა ზაზა სარალიძემ.

მოკლული ბიჭის მამა მიხეილ კალანდიას დაკავებას ითხოვს, რომელიც საქმეში მოწმის სტატუსით იკითხება.

ზაზა სარალიძე ამბობს, რომ ბრალდებული შეეცადა, მისი საქციელი „შიშით“ აეხსნა და თქვა, რომ ხორავაზე განახლებული კონფლიქტის ინიციატორი დავით სარალიძე იყო.

„კალანდიას თუ მიანიჭებენ ბრალდებულის სტატუსს, მაშინ დარწმუნებული ვარ უფრო მეტ დეტალზე ალაპარაკდება და ყველაფერი გაირკვევა თუმცა მას პროკურატურის ყოფილი მაღალჩინოსანი მფარველობს და ეს იმ ვიდეო-კადრებითაც დასტურდება, რომელიც შაბათს გავრცელდა. ვითხოვ ის ორი ადამიანიც ჩაჯდეს ციხეში, რომელმაც ჩემს შვილს ბასრი საგნით ჭრილობები მიაყენა. რაც შეეხება ხელშემწყობებს, იმათ ვინც საქმე "შეკერა", მათ ამის შემდეგ მივხედავ“- აღნიშნა „ნიუპოსტთან“ ზაზა სარალიძემ.

მოკლული მოზარდის მამა „ნიუპოსტმა“ მაშინ ჩაწერა, როცა ის თბილისის პროკურატურაში იმყოფებოდა და ამავე უწყების ყოფილი მაღალჩინოსნის, მირზა სუბელიანის პასუხისმგებლობა მოითხოვა.

ზაზა სარალიძის თქმით, „შაბათის კურიერში“ გასული კადრებიდან ნათლად ჩანს, რომ სუბელიანი დანაშაულის დაფარვაში მონაწილეობდა.