ეპარქია ეკლესიის ძარცვისთვის დაკავებულის სასჯელისგან გათავისუფლებას ითხოვს

სამართალი - 13:20, 13 Aug, 2013

1217

ამის შესახებ ინფორმაციას ქიზიყი.გე ავრცელებს, გამოცემის ცნობით, შესაბამისი განცხადებით ეპისკოპოსმა მეუფე მელქისედეკ ხაჩიძემ ძალოვან უწყებებს უკვე მიმართა. მიმართვა საგამოძიებო მასალებს დაერთო.

სპეციალურ განცხადებაში მეუფე მელქისედეკი წერს, რომ დაკავებული სასჯელისგან გათავისუფლდეს და სულიერი ცხოვრების წარმართვისათვის მონასტერს მიემაგროს. იქვე ნათქვამია, რომ ეპარქიას, რომელიც გამოძიებამ დაზარალებულად სცნო, არ აქვს პრეტენზია და არ სურს მისი სისხლის სამართლის წესით დასჯა.

ამავე საკითხზე ღია წერილს ავრცელებს ხორნაბუჯისა და ჰერეთის ეპარქიის მღვდელმსახური, იღუმენი მამა ონოფრე წულაძე:
"სიყვარულით მოუწოდებ ყველას, პირი რომელმაც წმ. სერაფიმე საროველის ტაძარში შეაღწია და შესაწირი ყუთიდან თანხა აიღო, განთავისუფლდეს სასჯელისაგან და მოემაგროს ჩვენს მონასტერს, ძმური დარიგებისა და სინანულის განცდისათვის, მისი შემდგომი სულიერი ცხოვრების წარმართვისათვის. ყოვლად უსამღვდელოესი მეუფე მელქისედეკი აკეთებს განცხადებას, რომ ეპარქიას რომელიც დაზარალებულად სცნო გამოძიებამ, არა აქვს პრეტენზია და არ სურს მისი დასჯა სისხლის სამართლის წესით, არამედ მონდომებულია და მზად ყოფნას გამოთქვამს იზრუნოს ამ ადამიანის სწორ, ქრისტიანულ გზაზე დაყენებისთვის, მისი შემდგომი ყოფის რეაბილიტაციისათვის. უფალმა შეიწყალოს ყოველი გზასაცდენილი და სინანულის გზით გააერთიანოს ქრისტეში!," – ნათქვამია მამა ონოფრე წულაძის მიერ გავრცელებულ მიმართვაში.

შეგახსენებთ, დედოფლისწყაროს რაიონის სოფელ სამრეკლოში, სერაფიმე საროველის ეკლესიის შესაწირი ყუთები 9 აგვისტოს გაქურდეს.
ამავე სოფლის მკვიდრი, 7 შვილიანი ოჯახის წევრი პოლიციამ მეორე დღეს დააკავა. ხელმოკლე ოჯახს საკუთარი ჭერი არ აქვს, რის გამოც სოფლის აბანოს ძველ შენობას აფარებს თავს. დაკავებულის მრავალშვილიანი დედის ინფორმაციით, ეკლესიის შესაწირი ყუთიდან მოპარული 55 ლარით მისმა შვილმა პური და ძეხვი შეიძინა, დანარჩენი თანხა კი არ დაუხარჯავს.