როგორც დემეტრე თავდადებულის 119 ნომერში მცხოვრები მოსახლეობა ამბობს, გვიან ღამით, დაახლოებით 24.00 საათზე გოგონა დაინახეს, რომელიც წყალს სვამდა და ტელეფონზე საუბრობდა. მათივე თქმით, დაზუსტებით ვერ იტყვიან, გოგონა დარეჯან დიასამიძე იყო თუ არა, თუმცა მას ძალიან ჰგავდა:

"დავინახეთ ეს გოგო და დავურეკეთ პატრულს, მაგრამ არ მოვიდა. პატრულმა გვითხრა, გამომძიებელს ეკუთვნის ეს საქმეო. დავინახე მეზობლის სახლის წინ. იცით როგორ იყო? არ იყო ნორმალურ ჭკუაზე. წყალი ეჭირა ხელში და სვამდა, აბნეული იყო. ნამდვილად არ ვიცი, ის გოგო თუ იყო, გავდა იმ გოგოს. მეზობელი გამოელაპარაკა. თქვა, რომ 31 დეკემბრის ქუჩას ეძებდა. მეზობელმა ასწავლა ქუჩა და წავიდა იქეთკენ. მეტი არაფერი არ ვიცი, ჩვენ ველოდებოდით პოლიციელს", - აღნიშნა ერთ-ერთმა მცხოვრებმა.

როგორც გოგონას დედა ლამზირა მახარაძე ამბობს, ვიდრე აჭარის პოლიციის უფროსს ვალერიან თელიას არ დაურეკეს, პოლიცია გამოძახებაზე არ მივიდა: "დემეტრე თავდადებულის ქუჩაზე მცხოვრებმა ქალბატონმა, რომელიც გოგონას სატელეფონო საუბარს ისმენდა, მას უთხრა: "ტელეფონზე ლაპარაკობდა, რომ მე სახლში არ დავბრუნდები, დედა მყავს თურქეთში და უნდა გადავიპაროო". შეუმჩნევიათ აივნიდან, რომ გოგო ლაპარაკობდა ტელეფონზე. ჩაცმულობა არ ეთანხმება ჩემი შვილის ჩაცმულობას, მაგრამ შეიძლება გამოიცვალა. თმაც შეჭრილი აქვს. ჩავიდა, გაესაუბრა. ამხანაგს ველოდები, უნდა მომაკითხოს, მაგრამ ტელეფონი გათიშული აქვსო. გამოიძახეს პატრული, მაგრამ არ იყო პატრული საქმის კურსში. არ იცოდნენ, ვინ იყო დარეჯან დიასამიძე და რატომ იძებნებოდა. მთავრობა გვეუბნება, ვდგავართ ფეხზე და შენს შვილს ვეძებთო. ეს როგორი ძებნაა. დილით შევატყობინეთ პოლიციას, 3 საათი ველოდებოდით, მაგრამ სანამ ვალერი თელიას არ დავურეკეთ, არ მოვიდა პოლიცია", - ამბობს ლამზირა მახარაძე.

შეგახსენებთ, რომ დარეჯან დიასამიძე 7 აგვისტოს დილის 10:00 საათიდან ნათესავის სახლიდან გავიდა და ამის შემდეგ შინ არ მისულა. მისი კვალი შუადღის სამ საათზე ბათუმში იკარგება.