104 წლის მეცნიერმა ევთანაზიის მეშვეობით სიცოცხლე ბეთჰოვენის ფონზე დაასრულა

ეს საინტერესოა - 17:13, 11 May, 2018

3162

104 წლის ავსტრალიელმა მეცნიერმა დევიდ გუდოლმა ევთანაზიის მეშვეობით სიცოცხლე დაასრულა.

დევიდი 20 წელია, რაც ევთანაზიის მომხრე ჯგუფის Exit International-ის წევრია.

10 მაისს მან შვეიცარიის ქალაქ ბაზელში, კლინიკაში ბეთჰოვენის ფონზე ევთანაზიით დაასრულა სიცოცხლე. შვეიცარიაში ევთანაზია დაშვებულია.

ევთანაზიამდე მეცნიერმა BBC-ის მისცა ინტერვიუ და განაცხადა, რომ ძალიან დაიღალა, დაუძლურდა და დროა, სიცოცხლეს დაემშვიდობოს.

ევთანაზია სამედიცინო დახმარების გზით ადამიანის მოკვდინების პრაქტიკაა. მსოფლიოს ქვეყნების უმეტესობაში ევთანასია უკანონო ქმედებაა. ევთანასია სადავო საკითხია არა მხოლოდ იმიტომ, რომ მასთან მრავალი განსხვავებული მორალური დილემაა ასოცირებული, არამედ მისი განსაზღვრებიდან გამომდინარეც. რადიკალურად განსხვავებული პოზიციების პირობებში, ევთანასიის მომხრეთა აზრით ევთანასია, ანუ ექიმის დახმარებით გარდაცვალება, ან ექიმის მიერ თვითმკვლელობაში დახმარება არის სიკვდილის თანამგრძნობი მეთოდი. ევთანასიის ოპონენტთათვის ეს მეთოდი მკვლელობის ერთ-ერთი ფორმაა. ევთანასიის განხორციელების სხვადასხვა მეთოდები არსებობს და შესაბამისად არსებობს სხვადასხვა ტერმინოლოგიებიც. ევთანასია წარმოადგენს პიროვნების განზრახ მოკვდინებას ამ პიროვნებისვე სასარგებლოდ.

უმეტეს შემთხვევებში ევთანასია იმიტომ ტარდება, რომ გარდაცვალების პირას მყოფი პიროვნება ამას ითხოვს, მაგრამ არსებობს ევთანასიის განსხვავებული სახეებიც, როდესაც პიროვნებას ასეთი თხოვნის განხორციელება არ შეუძლია. პიროვნება, რომელსაც ევთანასია უტარდება როგორც წესი განუკურნებელი ავადმყოფობით არის დაავადებული, მაგრამ არსებობს სხვა შემთხვევებიც, როდესაც ადამიანები ევთანასიას ითხოვენ. ევთანასიის განხორციელება შესაძლებელია როგორც ქმედებით (ლეტალური ინექცია) ასევე უმოქმედობით (მაგალითად საკვები მილის გაუმართაობა).

აღსანიშნავია, რომ საქართველოში ევთანასია აკრძალულია და დასჯადია.