38 წლიანი მმართველობის შემდეგ, ბრეჟნევის ანგოლელი მეგობარი პრეზიდენტის თანმდებობას ტოვებს, თუმცა პარტიის თავმჯდომარედ რჩება

მსოფლიო - 15:52, 11 May, 2018

1748

38 წლის შემდეგ ანგოლას ახალი სახელმწიფო მეთაური ეყოლება. მოქმედმა პრეზიდენტმა 74 წლის ჟოზე ედუარდო დუშ სანტოშმა, რომელიც ანგოლას 1979 წლიდან მართავს და თავის დროზე სსრკ-ს ლიდერ ლეონიდ ბრეჟნევთან შესანიშნავი ურთიერთობა ჰქონდა, უარი განაცხადა მიმდინარე საპარლამენტო არჩევნებში პარტიული სიის პირველ ნომრობაზე და შესაბამისად პრეზიდენტობაზე, თუმცა იგი მმართველი პარტიის "ანგოლის განთავისუფლების სახალხო მოძრაობის" თავმჯდომარედ რჩება და ქვეყანაში მიმდინარე პოლიტიკურ პროცესებზე გავლენას შეინარჩუნებს.

დუშ სანტოში მეორე ადგილზეა მსოფლიოში მმართველობის პერიოდის ხანგრძლივობის მიხედვით, მას მხოლოდ ეკვატორიული გვინეის პრეზიდენტი თოედორო ობიანგა ნგემა მბასოგო უსწრებს.

დუშ სანტუშს განათლება საბჭოთა კავშირში, აზერბაიჯანის ნავთობისა და ქიმიის ინსტიტუტში აქვს მიღებული. იგი შესანიშნავად ფლობს რუსულს და კარგი ურთიერთობები აქვს, ბრეჟნევიდან მოყოლებული, რუსეთის ყველა ლიდერთან. მისი პირველი ცოლი (1966-79 წლებში) რუსი ეროვნებისაა. სულ ანგოლის პრეზიდენტს სამი ცოლი და 7 შვილი ჰყავს. მისი ქალიშვილი ისაბელ დუშ სანტუში, Forbes-ის მიხედვით პირველი აფრიკელი მილიარდერი ქალია. იგი Sonangol-ის, ანგოლის სახელმწიფო ნავთომომპოვებელი კომპანიის ხელმძღვანელია.