სამხედრო ექიმის დღესთან დაკავშირებით, გორის სამხედრო ჰოსპიტალს საქართველოს თავდაცვის მინისტრი ირაკლი ალასანია ესტუმრა და მემორიალური დაფის გახსნას დაესწრო.

"დღეს შეიარაღებული ძალები საქართველოს სამხედრო ექიმების დღეს აღნიშნავს. ეს ძალიან მნიშვნელოვანი დღეა იმიტომ, რომ სამხედრო ექიმის პროფესია არის ორმაგად დასაფასებელი. ის იცავს საკუთარ სამშობლოს იარაღით ხელში და ასევე, საკუთარ თანამებრძოლებს. ძალიან ბევრი გმირობის მაგალითი გვქონდა, განსაკუთრებით რუსეთ-საქართევლოს აგვისტოს ომის დროს. გიორგი აბრამიშვილი, რომელიც არ დაემორჩილა ევაკუაციის გეგმას და მობრუნდა ჰოსპიტალში, რათა გამოემჟღავნებინა თავისი პროფესიული ერთგულება საკუთარი პროფესიის მიმართ, რუსეთის მხრიდან ნასროლი ნაღმის მსხვერპლი გახდა. ჩვენ მივიღეთ გადაწყვეტილება და მისი სახელი გორის სამხედრო ჰოსპიტალს დავარქვით. გიორგი აბრამიშვილმა ევაკუაციის ბრძანების მიუხედავად, არ დატოვა საბრძოლო ტერიტორია, მაშინ როდესაც ქვეყნის პირველი პირებიც კი ტოვებდნენ ქვეყანას", - განაცხადა ირაკლი ალასანიამ.