მცირე ხანში "ნიუპოსტის" მიერ ექსკლუზიური ინფორმაციის გავრცელებიდან, სადაც აღწერილი იყო სოციალურად აქტიური, მოქმედი ხელისუფლების ოპონენტი ინტერნეტმომხმარებლის დაკავების დეტალები, სენაკის საპატრულო პოლიციაში მისულმა პოლიციის უცნობმა მაღალჩინოსნებმა თემურ ზარანდიას ხელწერილის დაწერა შესთავაზეს, რომ ხვალ სასამართლო პროცესზე გამოცხადდება და წინასწარი პატიმრობიდან გაათავისუფლეს.

თემურ ზარანდია ზუგდიდიდან თბილისის მიმართულებით საკუთარი, "მაზდას" მარკის ავტომანქანით ცოლ-შვილთან ერთად მგზავრობდა, როცა სენაკთან, ტრასაზე საპატრულო პოლიციამ არასწორი გასწრების გამო დააჯარიმა, ხოლო ქვითრის ჩაბარებისა და მას შემდეგ, რაც, თემურ ზარანდიას განცხადებით, უმისამართოდ შეიგინა, ხელბორკილები დაადეს და "საზოგადოებრივი თავშეყრის ადგილას ბილწსიტყვაობის" ბრალდებით დააკავეს.

თემურ ზარანდიამ ექსკლუზიურად "ნიუპოსტს" ისიც აცნობა, რომ სასამართლომ გადაწყვეტილება ვერ გამოიტანა, რადგან ის სასამართლო დარბაზში არ შეუშვეს, "შეუფერებელ ფორმაში" ყოფნის გამო (მას მოკლე შარვალი ე.წ. "შორტი" ეცვა და ბარგი თბილისში უნდა აეღო), რის შემდეგაც წინასწარი დაკავების საკანში გადაყვანას უპირებდნენ, თუმცა, მოგვიანებით გაათავისუფლეს.