ბრიტანეთში, სავარაუდოდ, რომის პაპის წმ. კლემენტ I-ის ძვალი აღმოაჩინეს

ეს საინტერესოა - 17:05, 02 May, 2018

1437

ნარჩენების შეგროვებისა და გადამუშავების ბრიტანულმა კომპანიამ მოულოდნელად საკუთარ საწყობში აღმოაჩინა ფლაკონი, სადაც მოთავსებულია ძვლის ნატეხი რომელიც შესაძლოა რომის მეოთხე ეპისკოპოსს (პაპს), კლემენტ I-ს ეკუთვნის.

კლემენტ I (ლათ. Clemens Romanus I) რომის მეოთხე ეპისკოპოსი (პაპი) იყო 88-97 წლებში. იგი არის როგორც მართლმადიდებელი, ასევე კათოლიკური ეკლესიის წმინდანი, ხსენების დღე ძველი სტილით 25 ნოემბერი, ახალი სტილით - 8 დეკემბერი.

როგორც მედია იუწყება, ძვლის ნატეხი მოთავსებულია წითელ და ოქროსფერ შუშიან ფლაკონში, რომელიც დაბეჭდილია სპეციალური ლუქით და წარწერით - "წმინდა კლემენტის, დიადი პონტიფიკოსის ძვალი".

კლემენტი რომში იზრდებოდა. მან ბრწყინვალე განათლება მიიღო, ფუფუნებით იყო გარემოცული, მაგრამ ახლობლების დაკარგვით დადარდიანებულმა ყმაწვილმა დაიწყო ფიქრი იმაზე, თუ რა ელოდა ადამიანს სიკვდილის შემდგომ და ცდილობდა ცხოვრების არსს ჩასწვდომოდა. როცა დედაქალაქამდე მიაღწია ცნობებმა ქრისტესა და მის სწავლებაზე, მან დატოვა სახლი, მამული და იქით გაეშურა, სადაც მოციქულები ქადაგებდნენ. ალექსანდრიაში კლიმენტი მოციქულ ბარნაბას შეხვდა, შემდეგ კი პალესტინაში ჩავიდა, პეტრე მოციქულის ხელით მოინათლა და მისი მოსწავლე, განუყრელი თანამგზავრი და მისი ღვაწლისა და ტანჯვით სავსე ცხოვრების მუდმივი თანაზიარი გახდა.

მეცნიერთა ერთ ნაწილს არ მიაჩნია, რომ ეს პაპი კლემენტი პირველის ძვალია. ლეგენდის თანახმად იგი ღუზაზე მიაბეს და ზღვაში დაახრჩვეს.