ღამის თბილისი: დალეწილი რესტორანი, ჩხუბი რუსთაველზე, ჟვანიას მოედანთან

ღამის თბილისი: დალეწილი რესტორანი, ჩხუბი რუსთაველზე, ჟვანიას მოედანთან - დაჭრილი მამაკაცი

საზოგადოება - 03:24, 10 Aug, 2013

8795

ყველაზე მძიმე სიტუაცია იყო ვაკეში, მოსაშვილის ქუჩაზე, სადაც რესტორან "ლოფტთან" სროლის ხმა ისმოდა. როგორც მოგვიანებით გაირკვა, რესტორნის დარბაზში დაწესებულების სტუმარ ორ სხვადასხვა ჯგუფს შორის ხელჩართული ჩხუბის შედეგად დაზიანდა რესტორნის ინვენტარი, დაშავდნენ როგორც მოჩხუბრები, ასევე ის მოქალაქეები, რომლებიც კონფლიქტში არ მონაწილეობდნენ.

მას შემდეგ, რაც რესტორნის დაცვამ საკუთარი ძალისხმევით მოჩხუბართა დაშოშმინება ვერ შეძლო, ადმინისტრაციამ საპატრულო პოლიცია გამოიძახა. როგორც თვითმხილველები ამბობენ, დაპირისპირებულთა გაშველება და სიტუაციის განმუხტვა ვერც საპატრულო პოლიციის ერთმა ეკიპაჟმა შეძლო, რის შემდეგაც დამატებითი ეკიპაჟები გამოიძახეს.

მოჩხუბრებმა რესტორანში თავდაპირველად მისულ პოლიციელებსაც ფიზიკური შეურაცხყოფა მიაყენეს და მათ მითითებებს არ დაემორჩილნენ, ხოლო დამხმარე ძალის მოსვლის შემდეგ პოლიციელები იძულებულნი გახდნენ, სიტუაციის განსამუხტად რამდენჯერმე გაესროლათ ჰაერში.
რესტორან "ლოფტში" დაპირისპირების დროს იქ შემთხვევით აღმოჩენილმა ევროკავშირში საქართველოს ელჩმა ელენე სამადაშვილმა რესტორანში შექმნილი სიტუაცია "ფეისბუქში", მომხდარიდან ცოტა ხანში აღწერა:

"ძლივს გამოვაღწიეთ ცოცხლებმა მოსაშვილიდან, დალეწილია ლოფტი, იყო სროლა და ისეთი აყალმაყალი, როგორიც 90-იანი წლების მერე არ გვინახავს. პატრული გვიან მოვიდა და მანქანიდან კარგა ხანს ვერ გადმოდიოდა, რადგან მათზეც მიიტანეს იერიში".

თბილისის ცენტრში ვაკე არ ყოფილა ერთადერთი ადგილი, რომელიც 10 აგვისტოს კრიმინალური ანგარიშსწორების ადგილად იქცა: ფიზიკური დაპირისპირება რუსთაველის გამზირზეც მოხდა. როგორც "ნიუპოსტს" თვითმხილველებმა აცნობეს, ოპერის წინამდებარე ტერიტორიაზე, ერთ-ერთი ბარის წინ, სავარაუდოდ, ნასვამი ახალგაზრდების ორი ჯგუფი ერთმანეთს დაუპირისპირდა.

თვითმხილველთა განცხადებით, სასტიკად სცემეს ოთხი ახალგაზრდა. ხელჩართული ჩხუბი დაახლოებით 5 წუთს გრძელდებოდა, ხოლო საპატრულო პოლიციის მანქანის გამოჩენის შემდეგ მოჩხუბრები დაიშალნენ. ტვითმხილველთა თქმით, საპატრულო პოლიცია სიტყვიერი გაფრთხილებით შემოიფარგლა, რადგან ჩხუბის მონაწილეებმა, რომლებსაც სახეზე დაზიანებები ემჩნეოდათ, განაცხადეს, რომ დაზიანებები დაცემის შედეგად მიიღეს.

კრიმინალური ფაქტი საბურთალოზე, ზურაბ ჟვანიას მოედანთანაც მოხდა, სადაც ურთიერდაპირისპირების დროს ერთი მამაკაცი დაჭრეს. როგორც საპარლამენტო უმცირესობის წევრმა დავით საყვარელიძემ აღნიშნა, დაჭრილის მდგომარეობა მძიმეა. "ნიუპოსტის" ინფორმაციით, გულმკერდში დაჭრილი მამაკაცი ერთერთ კლინიკაში გადაიყვანეს. დაპირისპირების მონაწილეთა ვინაობისა და ჩხუბის მოტივის დადგენა ჯერჯერობით, ვერ ხერხდება.

შეგახსენებთ,რომ კრიმინალური შემთხვევები თბილისის სხვადასხვა უბანში 9 აგვისტოს, ღამის საათებშიც მოხდა: სპორტის სასახლის წინ მოზარდი ცეცხლსასროლი იარაღით დაჭრეს, ასევე სროლის შედეგად დაიჭრა ახალგაზრდა მამაკაცი ვაზისუბანში, მეოთხე მიკრორაიონში მომხდარი დაპირისპირების შედეგად.

რამდენიმე დღის წინ კი ორხევის დასახლებაში, სავარაუდოდ, ცოტა ხნის წინ ამნისტირებულმა ყოფილმა პატიმარმა ყელში სასიკვდილოდ დაჭრა 20 წლის ახალგაზრდა, რომლის ცხედარი მოგვიანებით რიგითმა გამვლელებმა იპოვეს.

კრიმინალური ფაქტების მომრავლების მიუხედავად, მთავრობისა და საპარლამენტო უმრავლესობის წევრები აცხადებენ, რომ საგანგაშო არაფერი ხდება და კრიმინალური ფონი ქვეყანაში გაუარესებული არ არის, შსს-ს სტატისტიკის მიხედვით კი მიმდინარე წლის 7 თვის განმავლობაში, შარშანდელ ანალოგიურ პერიოდთან შედარებით, დაახლოებით 1.400 დანაშაულით ნაკლებია ჩადენილი, ხოლო დანაშაულის გახსნის მაჩვენებელი შარსანდელთან შედარებით გაიზარდა.