რა საგარეო პოლიტიკა ექნება პაშინიანს გაპრემიერების შემთხვევაში - ოპოზიციის ლიდერმა სამომავლო გეგმებზე პარლამენტში ისაუბრა

მსოფლიო - 13:51, 01 May, 2018

1391

სომხეთის პრემიერ-მინისტრობის კანდიდატი ნიკოლ პაშინიანი დეპუტატებს სიტყვით მიმართავს, როგორც პაშინიანმა ეროვნულ ასამბლეაში სიტყვით გამოსვლისას განაცხადა, მმართველ რესპუბლიკურ პარტიას სურდა სარგსიანის თანამდებობიდან წასვლით თავი გადაერჩინა და ეგონათ, რომ მასშტაბური სახალხო პროტესტი მხოლოდ ერთი პირის მიმართ იყო.

„ლოზუნგი „გადადგი ნაბიჯი - უარყავი სერგი“ მიმართული იყო არა კონკრეტულად ერთი პირის მიმართ, არამედ იმ სისტემის წინააღმდეგ, რომლის სახესაც წარმოადგენდა სერჟ სარგსიანი“- განაცხადა პაშინიანმა. მისი თქმით, რესპუბლიკური პარტია ცდილობს პრემიერის არჩევა ჩაშალოს.

„თქვენ არ გესმოდათ და არ გესმით, სომხეთში არსებული სიტუაცია. მე მინდა პირდაპირ გაგაფრთხილოთ, რომ სახალხო მოძრაობის მოთმინების გამოცდამ, შესაძლოა არაპროგნოზირებად შედეგებამდე მიგვიყვანოს. თქვენი ქმედება შესაძლოა პოლიტიკური ცუნამის მიზეზი გახდეს.“- აღნიშნა პაშინიანმა.

პაშინიანმა თავისი პოლიტიკური ხედვის ძირითად პუნქტებზეც ისაუბრა, რომლის განხორციელებასაც ის პრემიერად არჩევის შემთხვევაში აპირებს:

„ჩემი პრემიერობისას სომხეთი ევრაზიული ეკონომიკური კავშირის და კოლექტიური უსაფრთხოების შეთანხმების წევრად დარჩება. ეს პოზიცია, ვინმეს სურვილისგან ან პოზიციის ცვლილებისგან კი არ მომდინარეობს, არამედ იმ სახალხო მოძრაობის ლოგიკიდან, რომელმაც სომეხ ხალხს გამარჯვება მოუტანა.

ჩვენ ვთვლიდით და ვთვლით რუსეთს ჩვენ სტრატეგიულ პარტნიორად და ეს საერთო ეროვნული მოძრაობა არანაირ საფრთხეს არ უქმნის სომხურ-რუსულ ურთიერთობებს. ჩვენ განსაკუთრებულ მნიშვნელობას ვანიჭებთ სომხეთ-საქართველოს და სომხეთ-ირანის ურთიერთობებს.

ჩვენ გავაღრმავებთ ურთიერთობებს ევროკავშირთან. ჩვენ ყველაფერს გავაკეთებთ იმისთვის, რომ მოვითხოვოთ სომხეთის მოქალაქეებისთვის უვიზო რეჟიმი.

ამერიკის შეერთებულ შტატებთან მეგობრულ ურთიერთობებს სჭირდება ახალი იმპულსი. გავაღრმავებთ ურთიერთობას ჩინეთთან."- აღნიშნა პაშინიანმა.

ყარაბაღის საკითხზე საუბრისას, პაშინიანმა განაცხადა, რომ სასიცოცხლოდ მნიშვნელოვანია, ყარაბაღის მოსახლეობას ქონდეს თავისი მომავლის დამოუკიდებლად განსაზღვრის უფლება და ამ უფლების რეალიზაციის საერთაშორისო აღიარება. მისი თქმით, ის კონფლიქტის მშვიდობიანი მოგვარების მომხრეა.

პაშინიანის თქმით, წერტილი უნდა დაესვას ქვეყანაში შიშის ატმოსფეროს არსებობას და სომხეთის არცერთი მოქალაქე არ უნდა გრძნობდეს თავს სუსტად და უმნიშვნელოდ, ე.წ „კრიშის“ არყოლის შემთხვევაში. ამ ე.წ „კრიშად“ მათთვის სომხეთის კონსტიტუცია უნდა იქცეს.

„კანონის წინაშე ყველა თანასწორია და პირველ რიგში ეს შეეხება პრემიერის ოჯახს და ნათესავებს. შეწყდება ბიზნესში სახელისუფლებო ბერკეტების გამოყენება.“- განაცხადა პაშინიანმა.