1 მაისს სომხეთის ეროვნული ასამბლეა სპეციალურ სხდომას მართავს, რომელზეც ქვეყნის ახალი პრემიერ-მინისტრი უნდა აირჩიონ.

ამ თანამდებობაზე წარდგენილია ერთადერთი კანდიდატი, ოპოზიციის ლიდერი, ბლოკ „ელქის“ („გამოსავალი“) საპარლამენტო ფრაქციის თავმჯდომარე ნიკოლ პაშინიანი. თუმცა მის ბლოკს და ალიანს „ცარუკიანს“ , რომელმც პაშინიანს მხარდაჭერა აღუთქვა, მთლიანობაში მხოლოდ 47 დეპუტატი ჰყავთ, მთავრობის მეთაურის ასარჩევად კი 53 ხმაა საჭირო. პარლამენტში 58 მანდატს ჯერ კიდევ მმართველი გუნდი, სომხეთის რესპუბლიკური პარტია ფლობს. ხდომას ამ დროისთვის 105 დეპუტატიდან 102 ესწრება.

ეროვნული ასამბლეა პრემიერ მინისტრს დეპუტატების საერთო რაოდენობის ხმების უმრავლეობით ირჩევს, ამასთანავე ხმის მიცემა ღია და სახელობითი იქნება. თუ პარლამენტი ვერ აირჩევს მთავრობის ხელმძღვანელს, მაშინ 7 დღის შემდეგ ხელმეორე კენჭისყრა ჩატარდება, თუ მეორე მცდელობაც წარუმატებლად დასრულდება, პრეზიდენტი იძულებული იქნება დაითხოვოს პარლამენტი და 30-45 დღის განმავლობაში ვადამდელი საპარლამენტო არჩევნები დანიშნოს.

ამ დროისთვის ერევნის ცენტრში ათიათასობით მოქალაქეა შეკრებილი. ისინი ნიკოლ პაშინიანს მხარდაჭერას უცხადებენ. ოპოზიცია ვარაუდობს, რომ საპარლამენტო უმრავლესობა პრემიერის არჩევის პროცესის ჩაშლას შეეცდება.

ამ დროისთვის პრემიერობის კანდიდატი ნიკოლ პაშნიანი სხდომაზე სიტყვით გამოდის.

შეგახსენებთ, სომხეთის პრემიერ-მინისტრმა სერჟ სარგსიანმა პოსტი ფართომასშტაბიანი ანტისამთავრობო აქციების შემდეგ დატოვა.

სომხეთის პარლამენტმა სერჟ სარგსიანი პრემიერ-მინისტრის პოსტზე 17 აპრილს აირჩია. პარლამენტში კენჭისყრა, ქუჩის მასობრივი საპროტესტო აქციების ფონზე მიმდინარეობდა.

სერჟ სარგსიანის გაპრემიერების წინააღდმდეგ მიმართული საპროტესტო აქციებს მოძრაობა „გადადგი ნაბიჯი“, „უარი სერჟს“ და ფრონტი „სომხეთის სახელმწიფოს სახელით“ მარტის ბოლოდან ატარებდნენ. ისინი აპროტესტებენ იმას, რომ საკონსტიტუციო ცვლილებები სარგსიანმა თავის სასარგებლოდ გამოიყენა და ხელისუფლებაში ყოფნა კიდევ რამდენიმე წლით გაიხანგრძლივა. დემონსტრანტები მოითხოვდნენ, რომ ხელისუფლებას შეეწყვიტა დემოკრატიის პრინციპების, ადამიანის უფლებების და უმაღლესი კანონის წინააღმდეგ წასვლა.