"მაგნიტსკის აქტის" ევროკავშირისეული ვერსია - ევროპარლამენტარები ევროკავშირს კრემლის ანტიდემოკრატიული ნაბიჯების მიმართ რეაქციისკენ მოუწოდებენ

მსოფლიო - 11:53, 27 Apr, 2018

924

ევროპარლამენტარები ევროკავშირს რუსეთის ანტიდემოკრატიული ნაბიჯების მიმართ რეაქციისკენ მოუწოდებენ. ამის შესახებ საუბარია 26 აპრილით დათარიღებულ წერილში, რომელსაც 44 დეპუტატი აწერს ხელს. წერილის ადრესატები ევროკავშირის საბჭოს პრეზიდენტი, დონალდ ტუსკი, ევროპის კომისიის პრეზიდენტი, ჟან-კლოდ იუნკერი, ევროკავშირის საგარეო-პოლიტიკური ლიდერი, ფედერიკა მოგერინი და ევროკავშირის 28 წევრი ქვეყნის მეთაურები არიან. ისინი გამოდიან მოწოდებით შეიქმნას აშშ-ის "მაგნიტსკის აქტის" ევროკავშირისეული ვერსია. დეპუტატების აზრით, აუცილებელია, რომ ევროკავშირის მიერ დაწესებული შეზღუდვები გამკაცრდეს.

ევროპარლამენტარები ამბობენ, რომ ამ კანონის ევროკავშირისეულმა ვერსიამ მიზანში უნდა ამოიღოს "რუსი მაგნატები და ოლიგარქები, რომლებიც უპატიოსნო თანხებს წევრ ქვეყნებში ინახავენ და ათეთრებენ, რითიც პუტინს ეხმარებიან განახორციელოს თავისი ანტიდემოკრატიული ქმედებები". დეპუტატებს ამ ქმედებების მაგალითად მოაქვთ "არჩევნებში ჩარევა, კიბერთავდასხმები, ყალბი ახალი ამბები და პროპაგანდისტული კამპანიები".

„რუსეთი აგრძელებს მინსკის შეთანხმებით ნაკისრი ვალდებულებების იგნორირებას და უკრაინის, ისევე როგორც საქართველოს ტერიტორიები ოკუპირებული რჩება. პრეზიდენტი პუტინი აგრძელებს ასადის რეჟიმისთვის მნიშვნელოვანი სამხედრო დახმარების აღმოჩენას და სირიაში მშვიდობიანი მოქალაქეების წინააღმდეგ ქიმიური ნივთიერების გამოყენების საქმეზე – გაეროში გამოძიების დაბლოკვას. კრემლი რუსეთში აგრძელებს ქვეყნის დემოკრატიული ოპოზიციიის და დამოუკიდებელი მედიის შევიწროებას“- ნათქვამია ევროპარლამენტარების წერილში.