„პუტინი ჩვენი მეფე არაა, ჩვენ არ ვართ მონები“ - ნავალნი პრეზიდენტის ინაუგურაციამდე საპროტესტო აქციებს იწყებს

მსოფლიო - 12:15, 25 Apr, 2018

1491

პუტინის მორიგ ინაუგურაციამდე 2 დღით ადრე ალეკსეი ნავალნი საპროტესტო აქციის ჩატარებას აპირებს, რომლის მთავარი ლოზუნგიც იქნება „პუტინი ჩვენი მეფე არაა“.
მოსკოვის მერიამ ალეკსეი ნავალნის 5 მაისს აქციის ჩატარების ნებართვაზე უარი უთხრა, თუმცა რუსი ოპოზიციონერი და მისი მხარდამჭერები მოსკოვის ცენტრში გამოსვლას მაინც გეგმავენ. როგორც ნავალნი აცხადებს, აქციის ორგანიზატორების განცხადებაში ნათქვამი იყო, რომ აქციის ჩატარება ტვერსკაიას ქუჩაზე სურთ, თუმცა მზად არიან განიხილობ სხვა ვარიანტებიც დედაქალაქის ცენტრში, თუმცა დედაქალაქის მერიამ ამაზეც უარი უთხრა.

„მოსკოვის მერია უკანონოდ უარს გვეუბნება აქციის ჩატარებაზე. მათი აზრით ქალაქის ცენტრში ჩვენი ადგილი არაა. ცენტრი ეკუთვნის პუტინსა და „ედინაია რასიას“. რას ვიზამთ, ჩვენ ამაზე დათანხმება არ შეგვიძლია. ამიტომ ვმოქმედებთ კონსტიტუციის შესაბამისად. 5 მაისს 14:00 საათზე გამოვდივართ ტვერსკაიას ქუჩაზე. ჩვენ არ ვართ მონები.“- დაწერა ნავალნიმ ტვიტერზე.

რუსეთის პრეზიდენტის ვლადიმირ პუტინის მესამე ინაუგურაცია მოსკოვში 7 მაისს გაიმართება. პუტინის საწინააღმდეგო აქცია, 2012 წლის ინაუგურაციის წინა დღესაც გაიმართა, 2012 წლის 6 მაისს მოსკოვის ცენტრში ათეულობით ათასი ოპოზიციურად განწყობილი მოქალაქე გამოვიდა, თუმცა მაშინდელი მოვლენები მრავალრიცხოვანი დაკავებებით, დაპატიმრებებით და კანონმდებლობის გამკაცრებით დასრულდა.