სომხეთის ხელისუფლებამ ოპოზიციასთან მოლაპარაკებები გადადო - ოპოზიცია ხალხს ისევ ქუჩაში გამოსვლისკენ მოუწოდებს

მსოფლიო - 10:21, 25 Apr, 2018

1475

სომხეთის ოპოზიცია მომხრეებს დღეს დილიდან ერევანში რესპუბლიკის მოედანზე შეკრებისკენ მოუწოდებს.

აქცია მას შემდეგ დაიგეგმა, რაც ცნობილი გახდა, რომ სომხეთის პრემიერ-მინისტრის მოვალეობის შემსრულებელმა, ოპოზიციის ლიდერებთან უკვე შეთანხმებულ შეხვედრაზე უარი თქვა.

„პრემიერ-მინისტრის მოვალეობის შემსრულებელს, პარლამენტის სპიკერსა და რესპუბლიკური ფრაქციის ხელმძღვანელს მოლაპარაკებების გამართვა სამი სამზე ფორმატში შევთავაზეთ. შეხვედრა ჟურნალისტების თანდასწრებით და ჩვენი მოთხოვნების გარშემო უნდა წარმართულიყო, თუმცა, მოვლენების განვითარება გვაფიქრებინებს, რომ სერჟ სარგსიანის გადადგომა რესპუბლიკურმა პარტიამ შესაძლოა ძალაუფლება შენარჩუნებისთვის გამოიყენოს. ჩვენ ამას ვერ დავუშვებთ. ხალხმა გაიმარჯვა და ეს გამარჯვება ცვლილებებით უნდა გავამყაროთ. მოსახლეობას სამოქალაქო დაუმორჩილებლობის აქციების განახლებისკენ მოვუწოდებთ. ჩვენ კიდევ ერთი კვირა გვჭირდება საბოლოო გამარჯვებისთვის“- აცხადებს ნიკოლ პაშინიანი ვიდეო მიმართვაში.

შეგახსენებთ, ოპოზიციის ლიდერი ნიკოლ პაშინიანი გუშინ აცხადებდა, რომ ხელისუფლებასთან შეხვედრა დღეს უნდა გამართულიყო.

პაშინიანი დიალოგის წინაპირობად პრემიერის მოვალეობის შემსრულებლის, პარლამენტის სპიკერის და საპარლამენტო უმრავლესობის ლიდერის ჩართვას ასახელებდა.

მისივე თქმით, ნიკოლ ფაშინიანის თქმით, მოლაპარაკების ერთადერთი საკითხი ხელისუფლების მშვიდობიანი გადაბარება უნდა ყოფილიყო.