მაკრონმა ტრამპს საჩუქრად ხე ჩაუტანა და ირანთან დაკავშირებით მის გადარწმუნებას შეეცდება

მსოფლიო - 12:17, 24 Apr, 2018

2627

საფრანგეთის პრეზიდენტი სამდღიანი ოფიციალური ვიზიტით ვაშინგტონში იმყოფება. ეს ამერიკის შეერთებულ შტატებში ემანუელ მაკრონის პირველი ოფიციალური ვიზიტია, თუმცა მაკრონი და ტრამპი ამ დრომდე ერთმანეთს 6 ჯერ შეხვდნენ, ტელეფონით კი ოცზე მეტჯერ ისაუბრეს.

საფრანგეთის პრეზიდენტის ვაშინგტონში ჩასვლის შემდეგ, ემანულელ მაკრონმა და მისმა მეუღლემ, პრეზიდენტ ტრამპთან და აშშ-ის პირველ ლედისთან ერთად თეთრი სახლის ეზოში მუხა დარგეს, რომელიც საფრანგეთის იმ რეგიონიდან ჩაიტანეს, სადაც მეორე მსოფლიო ომის დროს 9 ათასზე მეტი ამერიკელი ჯარისკაცი დაიღუპა. ელისეის სასახლის განცხადებით, აშშ-ის და საფრანგეთის პრეზიდენტებს მეგობრული და განსაკუთრებული ურთიერთობა აქვთ.

მაკრონი და ტრამპი ოფიციალურ მოლაპარაკებებს დღეს დაიწყებენ. უცხოური მედიის ინფორმაციით საფრანგეთის პრეზიდენტი შეეცდება დაარწმუნოს თავისი ამერიკელი კოლეგა, რომ ირანის ბირთვული შეთანხმებიდან არ გამოვიდეს. ამ შეტანხმებას ხელი 2015 წელს მოეწერა, ერთის მხრივ აშშ-ის, საფრანგეთის, ბრიტანეთის, გერმანიის, რუსეთისდა ჩინეთის, მეორე მხრივ კი ირანის მიერ. შეთანხმება გულისხმობდა იმას, რომ საერთაშორისო სანქციების გაუქმების სანაცვლოდ ირანი ბირთვული განვითარების პროგრამას შეაჩერებდა. ტრამპმა არაერთხელ ისაუბრა ამ ხელშეკრულებიდან გამოსვლის შესაძლებლობაზე, იმ შემთხვევაში, თუ შეთანხმებაში კორექტივებს არ შეიტანდნენ.

ოთხშაბათს მაკრონი აშშ-ის კონგრესის წინაშე წარსდგება, საფრანგეთის პრეზიდენტი ამრიკელ კანონმდებლებს ინგლისურ ენაზე მიმართავს.