ოპოზიციის ლიდერი ნიკოლ პაშინიანი სათავეში ჩაუდგება მოძრაობას ციცერნაკაბერდში, რომელიც დღეს 15:00 საათზე დაიწყება რესპუბლიკის მოედნიდან. ამის შესახებ იგი Facebook-ის საკუთარ გვერდზე წერს.

მისივე თქმით, ხელისუფლებასთან მოლაპარაკების მეორე რაუნდი ხვალ გაიმართება

„ძვირფასო თანამოაზრეებო, დღეს, 24 აპრილს, ჩვენ პატივი უნდა მივაგოთ სომეხი ერის გენოციდს. მინდა შეგახსენოთ, რომ 15:00 საათზე რესპუბლიკის მოედნიდან გავემართებით ციცერნაკაბერდისკენ. დღეს ჩვენი ქმედება ამით შემოიფარგლება, თუ არ მოხდა რაიმე ექსტრაორდინალური. როგორც ცნობილია, ხვალ გაიმართება მეორე რაუნდი მოლაპარაკებებისა ხელისუფლების გადმოცემის თაობაზე.

ასევე, ხვალ 19:00 საათზე კვლავ ჩავატარებთ მიტინგს რესპუბლიკის მოედანზე, რათა მოგაწოდოთ ინფორმაცია მოლაპარაკებების პროცესთან მიმართებით, ასევე იმის შესახებ, თუ რა ზომები იქნება მიღებული გამოცხადებული ხავერდოვანი რევოლუციის ლოგიკური და სრული დასასრულისთვის.

დღეს ჩვენ გამოვიყენებთ შესაძლებლობებს და ორგანიზებას გავუწევთ რიგ პოლიტიკურ კონსულტაციებს, რათა მკვეთრად დავაფიქსიროთ, რა ეტაპზე ვიმყოფებით და რა კონკრეტული ქმედებები იქნება მიღებული ერის დე-იურე გამარჯვებისთვის“ - ნათქვამია პაშინიანის მიმართვაში.