პრინცი ჩარლზი "ერთა თანამეგობრობის" მეთაური ხდება

მსოფლიო - 19:01, 21 Apr, 2018

4353

უელსის პრინცი ჩარლზი "ერთა თანამეგობრობის" მეთაური გახდება. იგი ამ პოსტზე დიდი ბრიტანეთის დედოფალ ელისაბედ მეორეს შეცვლის. ამის შესახებ განცხადება თანამეგობრობაში შემავალი ქვეყნების ლიდერებმა გააკეთეს.

ელისაბედ მეორემ აღნიშნა, რომ ჩარლზის ამ პოსტზე დანიშვნა მისი სანუკვარი სურვილი იყო. აღნიშნული ინიციატივა დადებითად პირველებმა ტერეზა მეიმ და კანადის პრემიერმა ჯასტინ ტრიუდომ შეაფასეს.

ტრადიციის თანახმად "ერთა თანამეგობრობას" ბრიტანეთის მონარქი ხელმძღვანელობს, მაგრამ ეს პოსტი მემკვიდრეობითი არ არის და გადაწყვეტილებას "ერთა თანამეგობრობის" წევრი 53 სახელმწიფოს ლიდერი იღებს.

ეს გადაწყვეტილება 46 ქვეყნის მეთაურმა და 7 ქვეყნის საგარეო საქმეთა მინისტრმა მიიღო, რომლებიც ორდღიან სამიტზე უინძორის სასახლეში შეიკრიბენ. აღიშნული საკითხის გარდა, სახელმწიფოების მეთაურებმა ქვენებს შორის ვაჭრობის, გენდერული თანასწორობისა და კლიმატური ცვლილებების საკითხებზე იმსჯელეს.

აქვე, დიდმა ბრიტანეთმა განაცხადა, რომ მზად არის კვლავ მიიღოს "ერთა თანამეგობრობის" რიგებში ზიმბაბვე, რომელიც ორგანიზაციიდან პრეზიდენტ მუგაბეს ინიციატივით 2003 წელს გავიდა.

ერთა თანამეგობრობა (ინგლ. The Commonwealth of Nations / 1946 წლამდე ბრიტანული ერთა თანამეგობრობა - The British Commonwealth of Nations) 1926 წელს დაარსდა. დღევანდელი სახით იგი 1949 წლიდან არსებობს. ორგანიზაციაში შედის დიდი ბრიტანეთი და ყველა ის სახელმწიფო, რომელიც წარსულში იყო ბრიტანეთის კოლონია, დომინიონი ან პროტექტორატი. მიუხედავად ამისა, ორგანიზაციის წევრია ორი ისეთი ქვეყანა, რომელიც არ შეესაბამება ამ კრიტერიუმს — მოზამბიკი და რუანდა.

"ერთა თანამეგობრობაში შედიან: ავსტრალია, ანტიგუა და ბარბუდა, ახალი ზელანდია, ბანგლადეში, ბარბადოსი, ბაჰამის კუნძულები, ბელიზი, ბოტსვანა, ბრუნეი, გაიანა, განა, გრენადა, დიდი ბრიტანეთი, დომინიკა, ვანუატუ, ზამბია, იამაიკა, ინდოეთი, კამერუნი, კანადა, კენია, კვიპროსი, კირიბატი, ლესოთო, მავრიკი, მალავი, მალაიზია, მალტა, მოზამბიკი, ნამიბია, ნაურუ, ნიგერია, პაკისტანი, პაპუა-ახალი გვინეა, სამოა, რუანდა, სამხრეთ აფრიკის რესპუბლიკა, სეიშელის კუნძულები, სენტ-ვინსენტი და გრენადინები, სენტ-კიტსი და ნევისი, სენტ-ლუსია, სვაზილენდი, სიერა-ლეონე, სინგაპური, სოლომონის კუნძულები, ტანზანია, ტონგა, ტრინიდადი და ტობაგო, ტუვალუ, უგანდა, ფიჯი, შრი-ლანკა.