დაუმორჩილებლობის მასშტაბური აქცია სომხეთში - ოპოზიციამ ერევნის გზების ბლოკირება მოახდინა

მსოფლიო - 14:08, 16 Apr, 2018

3113

დღეს დილით ერევანში, რამდენიმე ადგილზე საპროტესტო აქცია იმართება, აქციის მონაწილეებმა სომხეთის დედაქალაქის რამდენიმე მნიშვნელოვანი საავტომობილო გზა გადაკეტეს, ისინი პრემიერ-მინისტრის პოსტზე ყოფილი პრეზიდენტის სერჟ სარგსიანის წარდგენას აპროტესტებენ.

ერევნის ცენტრში მოძრაობა თითქმის სრულად ბლოკირებულია. პოლიცია აქციის მონაწილეების გზის სავალი ნაწილიდან ძალით გაყვანას ცდილობს. აქციის მონაწილეებმა დაიკავეს ერევნის პედაგოგიური უნივერსიტეტი.

„ჩვენ დავიწყეთ სამოქალაქო დაუმორჩილებლობის აქციები, მე მოვუწოდებ ყველა მოქალაქეს დაუწვნენ მანქანებს, დაკეტონ ქალაქის ქუჩები და გამზირები, ხელი შეუშალონ მეტროს მუშაობას. ისინი, ვინც წინააღდეგები არიან, რომ სარგისიანი პრემიერი გახდეს, უნდა მოვიდნენ ბაგრამიანის გამზირზე, პარლამენტის შენობასთან.“- განაცხადა ოპოზიციური პარტია „სამოქალაქო შეთანხმების“ ლიდერმა ნიკოლა პაშინიანმა. პაშინიანის ორგანიზებით აქციები უკვე მესამე დღეა მიმდინარეობს.

სომხეთის შინაგან საქმეთა სამინისტრომ აქციის მონაწილეები გააფრთხილა, რომ „მსგავსი ქმედებები შესაძლოა გადაიზარდოს მოქალაქეთა სიცოცხლის, ჯანმრთელობის და ქონების წინააღმდეგ ჩადენილ დანაშაულში და შეახსენა, რომ მშვიდობიანი შეკრების უფლება არ ატარებს აბსოლუტურ ხასიათს და შესაძლებელია სიტუაციიდან გამომდინარე დაექვემდებაროს პოლიციელების მხრიდან შეზღუდვას.“

სომხური მედიის ცნობით, დღეს დილიდან ქალაქში აქციის მონაწილეებსა და მძღოლებს შორის რამდენიმე დაპირისპირება მოხდა.

პოლიციელები აქციის მონაწილეებს პარლამენტთან მიახლოების საშუალებას არ აძლევენ. მატარებლის გაჩერება არ ხდება „მარშალ ბაგრამიანის“ სახელობის მეტროსადგურზე, რომელიც პარლამენტთან ახლოს მდებარეობს .

კონსტიტუციის რეფორმმის შემდეგ სომხეთი საპარლამენტო მმართველობის ფორმაზე გადავიდა. პრეზიდენტს დარჩა მთავარი წარმომადგენლობითი ფუნქციები და მას პარლამენტი ირჩევს. სახელმწიფო მართვის სათავეში პრემიერი იქნება და აღმასრულებელ ხელისუფლებასაც სწორედ ის უხელმძღვანელებს, მისი არჩევა კი პარლამენტში 17 აპრილს უნდა მოხდეს. ამ პოსტზე ყოფილი პრეზიდენტი სერჟ სარგსიანი აპირებს კენჭისყრას. მისი კანდიდატურა მმართველმა გუნდმა უკვე წარადგინა.