ერევანში, ოპოზიციონერი მომიტინგეები სომხეთის საზოგადოებრივი რადიოს შენობაში შეიჭრნენ

მსოფლიო - 22:30, 14 Apr, 2018

2256

ერევანში, სომხეთის ოპოზიციური პარტიები მეორე დღეა საპროტესტო აქციებს მართავენ. ისინი ყოფილი პრეზიდენტის სერჟ სარგსიანის პრემიერ-მინისტრის პოსტზე წარდგენას აპროტესტებენ.

დღეს რამდენიმე ასეული მომიტინგე ოპოზიციონერი დეპუტატის ნიკოლო პაშინიანის ხელმძღვანელობით სომხეთის საზოგადოებრივი რადიოს შენობაში შეიჭრა და პირდაპირი ეთერი მოითხოვა. მათ რადიოს შენობა რამდენიმე წუთით ჰქონდათ დაკავებული. შემდეგ ნიკოლო პაშინიანმა ერთერთ სტუდიაში, ტელეკამერების წინ განცახდება გააკეთა, სადაც სახელმწიფო მედიას საინფორმაციო ბლოკადასა და მიკერძოებულობაში დასდო ბრალი. რის შემდეგადაც აქციის მონაწილეებმა შენობა დატოვეს და ერევნის ქუჩებში მსვლელობა მოაწყეს.

სომხეთის პოლიციამ აღნიშნულ ფაქტთან დაკავშირებით პაშინიანს სამართალდარღვევაში დასდო ბრალი და განაცხადა, რომ "შესაბამისი საფუძვლების არსებობის შემთხევაში მას შეიძლება სისხლისსამართლებრივი პასუხისმგებლობაც დაეკისროს".

შეგახსენებთ, რომ სომხეთი საკონსტიტუციო რეფორმის შემდეგ საპარლამენტო რესპუბლიკა გახდა და აღმასრულებელი ხელისუფლების მართვა პრემიერის ხელში გადავიდა. ოპოზიცია თავიდანვე აპროტესტებდა ამ ცვლილებას, რადგან მიაჩნდა, რომ სერჟ სარგსიანს ამ მეთოდით ხელისუფლებაში ყოფნის გახანგრძლივება სურდა. 2 მარტს სომხეთის პარლამენტმა პრეზიდენტად არმენ სარქისიანი აირჩია, ხოლო 17 აპრილს მმართველი რესპუბლიკური პარტია პარლამენტის სხდომაზე, პრემიერ-მინისტრის პოსტზე სერჟ სარგისიანის კანდიდატურას დააყენებს კენჭისყრაზე.