ჩინეთში ბავშვი მშობლების სიკვდილიდან 4 წლის შემდეგ დაიბადა

ეს საინტერესოა - 16:11, 12 Apr, 2018

2876

ჩინეთში ბავშვი მშობლების სიკვდილიდან 4 წლის შემდეგ დაიბადა, ამის შესახებ ადგილობრივი მედია იტყობინება, ის სუროგატმა დედამ გააჩინა.

2013 წელს მომხდარი სასიკვდილო ავტოავარიამდე ცოტა ხნით ადრე წყვილმა იმ იმედით, რომ ხელოვნური განაყოფიერებით შვილი ეყოლებოდათ, რამდენიმე ემბრიონი გაყინა.

ავტოკატასტროფის შემდეგ წყვილის მშობლები სასამართლოში დიდხანს იბრძოდნენ იმისთვის, რომ ემბრიონის გამოყენების უფლება მოეპოვებინათ. ბავშვი დეკემბერში ლაოსელმა სუროგატმა დედამ გააჩინა.

გაზეთი Beijing News, იმ პროცესზე და დაბრკოლებებზე წერს, რომლის გავლაც მოუწიათ ბავშვის ბებია-ბაბუებს, იმის გამო, რომ ამგვარ საქმეზე სამართლებრივი პრეცედენტი არ არსებობდა.

ავტოკატასტროფის დროს ემბრიონი ჩინეთის ქალაქ ნანკინის საავადმყოფოში, -196 გრადუსზე თხევადი აზოტის კონტეინერში ინახებოდა.

ხანგრძლივი იურიდიული გარჩევების შემდეგ სასამართლომ დაღუპული წყვილის მშობლებს ემბრიონის გამოყენების უფლება მისცა. მედიის ინფორმაციით, აქამდე არ ყოფილა შემთხვევა, რომ მშობლებს მათი შვილების მიერ გაყინული ემბრიონი მიეღოთ მემკვიდრეობით.

ამით მომავალი ბებია-ბაბუების გამოცდა არ დასრულებულა, ემბრიონების გამოტანა ნანკინის საავადმყოფოდან მხოლოდ იმ პირობით იყო შესაძლებელი, რომ მას სხვა საავადმყოფოში მიიღებდნენ. თუმცა ემბრიონებთან დაკავშირებით ჩინეთში არსებული იურიდიული გაურკვევლობის გამო შეუძლებელი გახდა ისეთი სამედიცინო დაწესებულების პოვნა, რომელიც ამაში მონაწილეობას მიიღებდა. ამის გარდა ჩინეთში აკრძალულია სუროგატი დედობაც. წყვილის მშობლებს მოუწიათ ემბრიონი საზღვარგარეთ წაეღოთ - ეს იყო ერთადერთი გზა ამ პრობლემის გადასაჭრელად.

საბოლოოდ დაუპული წყვილის მშობლებმა გადაწყვიტეს, რომ იმ სუროგაციის ცენტრის მომსახურებით ისარგებლებდნენ, რომელიც ლაოსში მდებარეობს, თუმცა კიდევ ახალი პრობლემა წარმოიშვა - არცერთი ავიაკომპანია არ დათანხმდა იმას, რომ მათ ბორტზე თხევადი აზოტით სავსე კონტეინერი აეტანათ, ამიტომ მათ მოუწიათ, რომ კონტეინერი ავტომანქანით წაეღოთ.

ლაოსში ემბრიონი სუროგატი დედის საშვილოსნოში გადაიტანეს და 2017 წლის დეკემბერში სამყაროს მოევლინა ბიჭი, რომელსაც ტიანტიანი დაარქვეს.

აღსანიშნავია ის, რომ ტიანტიანი არა ლაოსში, არამედ ჩინეთში დაიბადა, სადაც მისი სუროგატი დედა უბრალო ტურისტული ვიზით ჩავიდა. იმის გამო რომ ბიჭის არცერთი მშობელი ცოცხალი არაა , ბიჭის ბებია-ბაბუებს, ოთხივეს მოუწიათ დნმ-ის ანალიზის ჩაბარება, იმის დასადასტურებლად, რომ ტიანტიანი ნამდვილად მათი შვილიშვილია და რომ მისი ორივე მშობელი ჩინელი იყო, რაც იმას ნიშნავს, რომ ის ჩინეთის მოქალაქე იქნება.