რუსულმა გემებმა აშშ-ს შესაძლო სარაკეტო დარტყმის გამო სირიის სამხედრო-საზღვაო ბაზა დატოვეს

მსოფლიო - 14:11, 12 Apr, 2018

6951

რუსულმა ხომალდებმა სირიის ქალაქ ტარტუსის სიახლოვეს მდებარე სამხედრო-საზღვაო ბაზა დატოვეს. ეს დასტურდება იმ სატელიტური სურათებით რომელიც ისრაელის კომპანიამ ImageSat International-მა გამოაქვეყნა.

კომპანიის მონაცემებით, ჩვეულებრივ პორტში 9 რუსული გემი მაინც იყო, თუმცა 11 აპრილის მონაცემებით, ადგილზე მხოლოდ „პალტუსის“ კლასის წყალქვეშა ნავი რჩება.

ISI სპეციალისტები მიიჩნევენ, რომ რუსეთის საზღვაო გემების პორტიდან გასვლა დაკავშირებულია აშშ-ის მოსალოდნელ სარაკეტო დარტყმაზე, რომელიც ვაშინგტონი ქალაქ დუმაში ქიმიური იარაღის გამოყენების საპასუხოდ აპირებს.

როგორც ცნობილია, ტომაჰაუკის 60 რაკეტით აღჭურვილი ამერიკული ხომალდი Donald Cook-ი ტარტუსს მიუახლოვდა. მოგვიანებით ავიაკომპანიებმა მიიღეს გაფრთხილება, რომ აღმოსავლეთ ხმელთაშუაზღვისპირეთში მყოფი აშშ-ის საზღვო ძალების გემები რაკეტების გაშვებას 72 საათის განმავლობაში დაიწყებენ.

ვრცელდება ინფორმაცია იმის შესახებაც, რომ ხომალდების გაყვანა შესაძლოა ხმელთაშუაზღვაში რუსული ფლოტის დაგეგმილ სწავლებებს უკავშირდებოდეს, გრაფიკის თანახმად, 11-12 აპრილს სირიის სანაპიროსთან რუსული გემები საწვრთნელ სროლებს განახორციელებენ.

შეგახსენებთ, თეთრი სახლის განცხადებით, პრეზიდენტ ტრამპს ჯერ არ მიუღია საბოლოო გადაწყვეტილება სარაკეტო დარტყმასთან დაკავშირებით და ქალაქ დუმაში ქიმიური იარაღის გამოყენების პასუხად რამდენიმე ვარიანტს განიხილავს, აშშ ასევე უშვებს დიპლომატიური არხების გამოყენების შესაძლებლობასაც.