NASA მამაკაცის სპერმატოზოიდების ქცევას კოსმოსში დააკვირდება

ეს საინტერესოა - 18:15, 11 Apr, 2018

1224

უახლოეს მომავალში საერთაშორისო კოსმოსური სადგურის ეკიპაჟი გაალღობს სპერმის მარაგს, რომელიც სადგურზე ხომალდმა Dragon-მა ჩამოიტანა და შეამოწმებს, თუ როგორ მოიქცევიან ადამიანის სასქესო უჯრედები კოსმოსში, - აცხადებს Space.com.

"წინა ცდები, რომელიც ხარებისა და ზღვის ზღარბების სერმაზე ჩავატარეთ, ცუდად დასრულდა. მართალია, უწონობის პირობებში, სასქესო უჯრედები უფრო სწრაფად იწყებენ მოძრაობას, ვიდრე დედამიწაზე, მაგრამ ისინი ცუდად, ან საერთოდ არ ერწყმიან კვერცხუჯრედებს, რაც კოსმოსში ბავშვის ჩასახვის პრობლემას ქმნის," - აცხადებენ NASA-ში.

ღია კოსმოსში არსებული რადიაციის მაღალი დონე, მეცნიერების აზრით, მთავარი წინააღმდეგობაა ადამიანის "კოსმოსურ სახეობად" გადაქცევის პროცესში. ეს გამოსხივება ყველაზე დიდი საფრთხეს სასქესო უჯრედებს უქმნის, რომლებიც დაყოფის რამდენიმე ფაზას გადიან, სანამ ისინი განაყოფიერებისათვის მზად იქნებიან.

გამრავლების პირველი ცდები, რომელიც მწერებზე, თევზებზე და კიდევ რამდენიმე სახეობაზე ჩატარდა, ადასტურებს, რომ ფაქტიურად არაფერი უშლის ხელს გამრავლებას უწონობის პირობებში. თუმცა, პრიმატებზე ეს ასეთი ცდები არ ჩატარებულა. ასევე არ შეფასებულა შთამომავლობის სიცოცხლისუნარიანობა, რადგან კოსმოსურ სადგურზე შეუძლებელია ერთდროულად თაგვებისა თუ სხვა ცხოველების ასეული ერთეულის გამრავლება.

სწორედ ამას ემსახურება ადამიანის სასქესო უჯრედებზე დაგეგმილი ცდები, რომელიც უახლოესი კვირეების განმავლობაში ჩატარდება. ამისთვის ასტრონავტები სასქესო უჯრედებს სასიგნალო მოლეკულების ორი ნაკრებით დაამუშავებენ, რომლებიც შექმნიან საშვილოსნოს ქიმიური გარემოს იმიტაციას. პირველი მათ აიძულებს დამოუკიდებლად იმოძრაონ, ხოლო მეორე ჩართავს სპეციალურ რეაქციათა ჯაჭვს, რომელიც მათ კვერცხუჯრედთან შერწყმის წინაპირობას შეუქმნის. ამ პროცესის შედეგად ასტრონავტები უჯრედების ათეულობით ფოტოსურათს მიიღებენ, ხოლო შემდეგ კვლავ გაყინავენ და დედამიწაზე გააგზავნიან, შემდგომი შესწავლისათვის.

ეს მეცნიერებს შესაძლებლობას მისცემს დაადგინონ არის თუ არა სხვაობა სასქესო უჯრედების ქცებვაში კოსმოსსა და დედამიწაზე და გააკეთონ დასკვნა, რამდენად არის შესაძლებელი ბუნებრივი ჩასახვა უწონობის პირობებში, რაშიც დღემდე მეცნიერებს ეჭვი ეპარებათ.