რას უმზადებს ტრამპი ასადის რეჟიმს - მსოფლიო მედიის მოსაზრებები

მსოფლიო - 14:36, 11 Apr, 2018

4332

აშშ-ის პრეზიდენტმა დონალდ ტრამპმა ორშაბათს, 9 აპრილს განაცხადა, რომ 48 საათში მიიღებს გადაწყვეტილებას, რა პასუხს გასცემს სირიაში, ქალაქ დუმაში, ხელისუფლების მიერ ქიმიური იარაღის გამოყენების ფაქტს. ასადის რეჟიმისთვის მკაცრი პასუხის გაცემას 10 აპრილს მხარი დიდი ბრიტანეთის პრემიერმა ტერეზა მეიმ და საფრანგეთის პრეზიდენტმა ემანუელ მაკრონმა დაუჭრეს, თუმცა, მათ ღია სამხედრო ჩარევაზე არ უსაუბრიათ. ვადის ამოწურვამდე რამდენიმე საათი დარჩა.

ტრამპი აცხადებს, რომ მას "პასუხის რამდენიმე სამხედრო ვარიანტი" აქვს. ამასთან, ქიმიური შეტევის ადგილას უახლოეს მომავალში "ქიმიური იარაღის აკრძალვის საერთაშორისო ორგანიზაციის წევრები ჩადიან, რათა მტკიცებულებები მოიპოვონ.

New York Times-ის ცნობით, ტრამპი ამჟამა სამხედრო მრჩევლებთან განიხილავს უფრო მძლავრი სამხედრო დარტყმის განხორციელების შესაძლებლობას, ვიდრე სარაკეტო დარტმა, რომელიც 2017 წლის აპრილში განახორციელა. მათი აზრით, მხოლოდ ეს შეაცერებს ასადის რეჟიმს, მომავალში ქიმიური იარაღის გამოყენებისაგან.

Guardian-ი თვლის, რომ ერთადერთი ეფექტური დარტყმა სირიის სამხედრო ავიაციის სრული განადგურება იქნებოდა. სამხედრო ექსპერტის აზრით, ამის განხორცილება აშშ-ს სავსებით ხელეწიფება.

Los Angeles Times-ი ვარაუდობს, რომ თუ ტრამპმა მასირებული ავიადარტყმები განახორციელა, მას შეიძლება სირიაში მყოფი რუსი სამხედრო მოსამსახურეებიც შეეწირონ. თუმცა, სავარაუდოდ, ვაშინგტონი დარტყმამდე მოსკოვს წინასწარ გააფრთხილებს, ზუსტი დროისა და ადგილის მითითების გარეშე. ამასთან, ლიბანში რუსეთის ელჩმა განაცხადა, რომ მოსკოვი სირიის მიმართულებით გამოშვებული რაკეტების ჩამოგდების უფლებას იტოვებს.

მზარდი დაძაბულობის ფონზე ევროპის საავიაციო უსაფრთხოების სააგენტომ ავიაკომპანიები გააფრთხილა, რომ აღმოსავლეთ ხმელთაშუა ზღვაში ნავიგაციას შეიძლება საფრთხე შეექმნას ან შეფერხებებით განხორციელდეს.