ლენინის ციტატები და ჩაგდებული რეზოლუციები - გაეროს უშიშროების საბჭოს უშედეგო სხდომა

მსოფლიო - 10:20, 11 Apr, 2018

1404

უშედეგოდ დასრულდა გაეროს უშიშროების საბჭოს მორიგი სხდომა, რომელსაც სირიაში, დუმაში მომხდარი ქიმიური შეტევის თაობაზე და მის გამოძიებაზე რეზოლუცია უნდა მიეღო.

პირველი კენჭისყრაზე ამერიკის შეერთებული შტატების რეზოლუცია დადგა, რომელიც მომხდარის სრულ გამოძიებას და თავდასხმის ორგანიზატორის დადგენას ითვალისწინებდა. აშშ-სთან ერთად, რეზოლუციაზე მუშაობდნენ კანადა, საფრანგეთი, ნიდერლანდები, პერუ, პოლონეთი, დიდი ბრიტანეთი, შვედეთი და თურქეთი. რეზოლუცია რუსეთმა ჩააგდო, რომელსაც ბოლივიამ აუბა მხარი.

ამის საპასუხოდ აშშ-მ, საფრანგეთმა და დიდმა ბრიტანეთმა ჩააგდო რუსეთის ორივე რეზოლუცია, რომელიც სირიის კრიზისს ეხებოდა.

კენჭისყრების შემდეგ, რუსეთის ვეტოს კომენტირებისას, დიდი ბრიტანეთის წარმომადგენელმა კარენ პირსმა მაგალითად ვლადიმირ ლენინის ციტატა - "რაოდენობა გადადის ხარისხში", მოიყვანა. საპასუხოდ, რუსეთის წარმომადგენელმა ვლადიმირ ნებეზნიამ განაცხადა, რომ მარქსი, ენგელსი და ლენინი ლონდონის ხშირი სტუმრები იყვნენ.

"მარქსი საფლავში გადატრიალდებოდა, როცა გაიგებდა თუ რამდენს აკეთებს მის პრინციპებზე დაფუძნებული სახელმწიფო სირიის მხარდასაჭერად," - უპასუხა პირსმა.