"ერთი კვირის წინ მოვედი გონს და მოხარული ვარ გითხრათ, რომ ყოველდღიურად თავს უკეთ ვგრძნობ"

"ერთი კვირის წინ მოვედი გონს და მოხარული ვარ გითხრათ, რომ ყოველდღიურად თავს უკეთ ვგრძნობ" - იულია სკრიპალი

მსოფლიო - 18:00, 05 Apr, 2018

3067

ერთი თვის წინ დიდ ბრიტანეთში მოწამლულმა იულია სკრიპალმა განცხადება გაავრცელა.

მისი განცხადება ლონდონის პოლიციამ გამოაქვეყნდა.

ყოფილი რუსი ორმაგი აგენტის, სერგეი სკრიპალის შვილი ამბობს, რომ ერთი კვირის წინ გონს მოვიდა და მისი მდგომარეობა დღითიდღე უმჯობესდება.

„მადლობელი ვარ ჩემ მიმართ გამოხატული ინტერესისა და იმ კეთილი სურვილებისთვის, რაც მივიღე. ერთი კვირის წინ მოვედი გონს და მოხარული ვარ გითხრათ, რომ ყოველდღიურად თავს უკეთ ვგრძნობ” - ნათქვამია განცხადებაში.

იულია სკრიპალი მადლობას უხდის საავადმყოფოსა და პოლიციის თანამშრომლებს, ასევე სოლსბერის მაცხოვრებლებს, რომლებმაც პირველივე წუთებში დახმარება აღმოუჩინეს.

განცხადებაში არაფერია საუბარი მამამისის ჯანმრთელობის მდგომარეობაზე.

შეგახსენებთ, აღნიშნულ განცხადებამდე, რუსულმა მედიამ სკრიპალების ნათესავის, ვინმე ვიკტორია სკრიპალის სატელეფონო ჩანაწერი გაავრცელეს. რუსული მედიის ცნობით, ვიქტორია იულიას ელაპარაკება, რომელიც ეუბნება, რომ ის კარგად არის. რაც შეეხება მამამისს, ჩანაწერში იულია(თუ ნამდვილად იულიაა) ამბობს, რომ ყველაფერი მშვენივრადაა, ის ისვენებს და სძინავს.

შეგახსენებთ, დიდი ბრიტანეთის ქალაქ სოლსბერიში, ყოფილი რუსი ორმაგი აგენტი 66 წლის სერგეი სკრიპალი და მისი 33 წლის შვილი იულია, 4 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი ამ დრომდე კომატოზურ მდგომარეობაში იმყოფება და გადარჩენისთვის იბრძვის. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."

ცნობილი გახდა ისიც, რომ სპეციალისტებმა ნერვულ-პარალიტიკური ნივთიერება სკრიპალების სახლში აღმოაჩინეს. გავრცელდა ვერსია, რომ სკრიპალები სახლის კარის საკეტზე წასმული "ნოვიჩოკით"მოიწამლნენ. მეორე ვერსიით, "ნოვიჩოკს" სკრიპალებისთვის რუსეთიდან ჩატანილი წიწიბურა შეიცავდა.

რუსეთის დაზვერვის ყოფილი თანამშრომლის მოწამვლის საქმეზე ლონდონმა მოსკოვიდან ახსნა-განმარტებები მოითხოვა და 24 საათიანი ვადა მისცა მოსკოვს , თუმცა პასუხი ვერ მიიღო. შედეგად კი ბრიტანეთმა მოსკოვს სანქციები დაუწესა.

ბრიტანეთმა რუსეთის უმაღლეს ხელისუფლებასთან ყველა დონის ურთიერთობა გაწყვიტა და ქვეყნიდან 23 რუსი დიპლომატი გააძევა. ბრიტანეთის მხარდასაჭერად მსოფლიოს 28 ქვეყნიდან , მათ შორის საქართველოდან, საერთო ჯამში 150 რუსი დიპლომატი გააძევს.