ბრიტანული მედია საიდუმლო რუსულ ლაბორატორიაზე წერს, სადაც სავარაუდოდ, სკრიპალებისთვის განკუთვნილი საწამლავი ნივთიერება „ნოვიჩოკი“ დამზადდა.

ამის შესახებ გამოცემა The Times-ი დაზვერვის წყაროზე დაყრდნობით წერს.

„ სპეცსამსახურები ფიქრობენ , რომ მათ საიდუმლო რუსული ლაბორატორიის კვალს მიაგნეს, სადაც სოლსბერიში გამოყენებული ნერვული აგენტი დაამზადეს“ - ნათვამია სტატიაში.

უცნობია, სად მდებარეობს ეს ლაბორატორია. თუმცა, როგორც გამოცემა დაზვერვიდან წყაროზე დაყრდნობით წერს, ბრიტანეთმა იცოდა ქიმიური ლაბორატორიის არსებობის შესახებ, სკრიპალების მოწამვლამდე იცოდა.

შეგახსენებთ, დიდი ბრიტანეთის ქალაქ სოლსბერიში, ყოფილი რუსი ორმაგი აგენტი 66 წლის სერგეი სკრიპალი და მისი 33 წლის შვილი იულია, 4 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი ამ დრომდე კომატოზურ მდგომარეობაში იმყოფება და გადარჩენისთვის იბრძვის. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."

ცნობილი გახდა ისიც, რომ სპეციალისტებმა ნერვულ-პარალიტიკური ნივთიერება სკრიპალების სახლში აღმოაჩინეს. გავრცელდა ვერსია, რომ სკრიპალები სახლის კარის საკეტზე წასმული "ნოვიჩოკით"მოიწამლნენ. მეორე ვერსიით, "ნოვიჩოკს" სკრიპალებისთვის რუსეთიდან ჩატანილი წიწიბურა შეიცავდა.

რუსეთის დაზვერვის ყოფილი თანამშრომლის მოწამვლის საქმეზე ლონდონმა მოსკოვიდან ახსნა-განმარტებები მოითხოვა და 24 საათიანი ვადა მისცა მოსკოვს , თუმცა პასუხი ვერ მიიღო. შედეგად კი ბრიტანეთმა მოსკოვს სანქციები დაუწესა.

ბრიტანეთმა რუსეთის უმაღლეს ხელისუფლებასთან ყველა დონის ურთიერთობა გაწყვიტა და ქვეყნიდან 23 რუსი დიპლომატი გააძევა. ბრიტანეთის მხარდასაჭერად მსოფლიოს 28 ქვეყნიდან საერთო ჯამში 150 რუსი დიპლომატი გააძევს.