ქვეყნის წინაშე მდგარი გამოწვევები რუსეთის მიერ ოკუპირებული ტერიტორიებიდან მომდინარე საფრთხეებსა და საერთაშორისო ტერორიზმს უკავშირდება

ქვეყნის წინაშე მდგარი გამოწვევები რუსეთის მიერ ოკუპირებული ტერიტორიებიდან მომდინარე საფრთხეებსა და საერთაშორისო ტერორიზმს უკავშირდება - სუს-ი

პოზიცია - 10:25, 04 Apr, 2018

1847

სახელმწიფო უსაფრთხოების სამსახურის 2017 წლის ანგარიშის მიხედვით, ქვეყნის წინაშე მდგარი გამოწვევები რუსეთის მიერ ოკუპირებული ტერიტორიებიდან მომდინარე საფრთხეებს უკავშირდება.

„ეროვნული უსაფრთხოების უზრუნველყოფა და საზოგადოების მშვიდობიანი თანაცხოვრებისთვის უსაფრთხო გარემოს შექმნა სახელმწიფო უსაფრთხოების სამსახურის საქმიანობის მთავარი პრიორიტეტია.

მსოფლიოში უსაფრთხოების გარემოს სწრაფი ცვალებადობის, საერთაშორისო ტერორიზმისა და რადიკალიზაციის, უცხო ქვეყნების სადაზვერვო სამსახურების საქმიანობის გააქტიურებისა და თანამედროვე ტექნოლოგიების განვითარების პარალელურად, იზრდება საერთაშორისო მოვლენების გავლენა ქვეყნის შიდა უსაფრთხოებაზე.

დღეისათვის ქვეყნის წინაშე მდგარი გამოწვევები უკავშირდება რუსეთის ფედერაციის მიერ ოკუპირებული ტერიტორიებიდან მომდინარე საფრთხეებს, საერთაშორისო ტერორიზმს, უცხო ქვეყნების სპეცსამსახურების საქმიანობას, კორუფციასა და სამოხელეო დანაშაულს, მასობრივი განადგურების იარაღისა და მასალების შესაძლო გავრცელებას და ა.შ.

სამსახური მოქმედებს საქართველოს კონსტიტუციური წყობილების, სუვერენიტეტის, ტერიტორიული მთლიანობის, სამხედრო და ეკონომიკური პოტენციალის, საშინაო და საგარეო უსაფრთხოების უზრუნველყოფის მიზნებიდან გამომდინარე.

სახელმწიფო უსაფრთხოების სამსახური საქმიანობისას ხელმძღვანელობს კანონიერების, ადამიანის ძირითადი უფლებებისა და თავისუფლებების დაცვისა და პატივისცემის, საქმიანობის ღია და ფარული ფორმების ერთობლიობის, თანაზომიერებისა და პოლიტიკური ნეიტრალობის პრინციპით.

სახელმწიფო უსაფრთხოების სამსახურის საქმიანობა მიმართულია შესაძლო საფრთხეების იდენტიფიცირებაზე, პრევენციასა და აღკვეთაზე, ასევე კომპეტენციის ფარგლებში, კანონით დადგენილი შესაბამისი ღონისძიებების გატარებაზე, რათა მაქსიმალურად იქნეს დაცული სახელმწიფოს ეროვნული ინტერესები და საქართველოს თითოეული მოქალაქის უსაფრთხოება.

საანგარიშო პერიოდში სამსახური დიდ ყურადღებას უთმობდა ინსტიტუციური შესაძლებლობების განვითარებას, ოპერატიული და ანალიტიკური საქმიანობის გაუმჯობესებას, ადამიანური რესურსების ეფექტიან მართვას, მატერიალურ-ტექნიკური ბაზის მოდერნიზებას, შიდაუწყებრივი და უწყებათაშორისი კოორდინაციისა და საერთაშორისო თანამშრომლობის გაღრმავებას“, – აღნიშნულია სუს-ის ანგარიშში.

სუს-ის საქმიანობის ამსახველი ანგარიში ბიუროს სხდომაზე გუშინ შევიდა და დოკუმენტი განსახილველად თავდაცვისა და უშიშროების კომიტეტს, ადამიანის უფლებათა დაცვის კომიტეტს და იურიდიულ საკითხთა კომიტეტს გადაეცა.

პარლამენტის რეგლამენტის თანახმად, სუსის ანგარიშის პლენარული სხდომის ფორმატში მოსმენა სავალდებულოა, რის შემდეგაც პარლამენტი სპეციალურ დადგენილებას იღებს.