"აფრიკის დედა" ვინი - ნელსონ მანდელას ყოფილი ცოლი გარდაიცვალა

მსოფლიო - 18:15, 02 Apr, 2018

1567

სამხრეთ აფრიკელი პოლიტიკოსი, ნელსონ მანდელას ყოფილი ცოლი ვინი მადიკიზელა-მანდელა 81 წლის ასაკში გარდაიცვალა.

ამის შესახენ ინფორმაცია მისმა ასისტენტმა გაავრცელა, თუმცა დეტალებზე არ უსაუბრია.

ვინი მადნელა სხვადასხვა დროს მთელ რიგ სამთავრობო პოსტებს იკავებდა, ასევე ხელმძღვანელობდა სამხრეთ აფრიკის ქალთა ეროვნულ კონგრესის ლიგას.

ვინი მანდელა საკმაოდ საკამათო ფიგურა იყო. მისი მხარდამჭერები მას „ერის დედას“ უწოდებენ, სამხრეთ აფრიკაში აპარტეიდის რეჟიმის წინააღმდეგ ბრძოლის სიმბოლოდ მიიჩნევდნენ, ნაწილი კი ადამანის უფლებების დარღვევებში ადანაშაულებდა.

2003 წელს სამხრეთი აფრიკის რესპუბლიკის დედაქალაქ პრეტორიის სასამართლომ ქურდობასა და თაღლითობაში დამნაშავედ სცნო.

"თქვენ მრავალი წელი მხარში ედექით მთელს მსოფლიოში ყველაზე საყვარელ და პატივცემულ სახელმწიფო მოღვაწეს, მაგრამ რაღაც მომენტში ყველაფერი უარესობისაკენ შეტრიალდაო", ამ ფრაზით გამოხატა ვინი მანდელასადმი დამოკიდებულებაში მომხდარი ცვლილება მოსამართლე პიტ ჯონსონმა.

ვინი 1936 წლის 26 სექტემბერს სამხრეთ აფრიკის აღმოსავლეთ პროვინციაში დაიბადა და სკოლის დამთავრების შემდეგ სოციალური სფეროს მუშაკის დიპლომი მიიღო, მოგვიანებით კი იოჰანესბურგის უნივერსიტეტის საერთაშორისო ურთიერთობათა ფაკულტეტი დაამთავრა. 1957 წელს მან გაიცნო აპარტეიდის მოწინააღმდეგე წამყვანი ორგანიზაციის, "აფრიკის ეროვნული კონგრესის" აქტივისტი, ნელსონ მანდელა, რომელზეც მომდევნო წელს დაქორწინდა კიდეც. მაგრამ 1964 წელს ნელსონ მანდელა დააპატიმრეს. ვინი მანდელა კი სწორედ მეუღლის დაპატიმრების შემდეგ ჩაება პოლიტიკაში, უფრო კონრეტულად რასიზმის წინააღმდეგ ბრძოლაში, რომელმაც მას დიდი ავტორიტეტი მოუხვეჭა არა მარტო შავკანიან თანამემამულეებს შორის, არამედ უცხოეთშიც.

ვინი მანდელა არაერთხელ დაუპატიმრებიათ და გადაუსახლებიათ. მისი პოპულარობა სულ უფრო იზრდებოდა.

მის გარშემო შემოკრებილი ახალგაზრდა მამაკაცები, თანდათან "დამსჯელი რაზმად " ჩამოყალიბდნენ. ისინი სასტიკად უსწორდებოდნენ მოწინააღმდეგეებს, პოლიციასთან თანამშრომლობაში ეჭვმიტანილ შავკანიანებს, და როგორც მოგვიანებით გაირკვა, არც მკვლელობაზე იხევდნენ უკან.

პატიმრობიდან ნელსონ მანდელას გათავისუფლების შემდეგ ცოლ-ქმარს შორის ურთიერთობა გაუარესდა და 1996 წელს განქორწინებით დამთავრდა.