ამერიკის შეეერთებული შტატების ვიზის მოთხოვნისას, ბოლო ხუთი წლის განმავლობაში სოციალურ ქსელების ანგარიშების მონაცემების წარდგენა იქნება საჭირო.

როგორც CNN იტყობინება, სახელმწიფო დეპარტამენტის მიერ შემუშავებული დოკუმენტების მიხედვით, ეს ცვლილება ყველა განმცხადებელს, დაახლოებით 15 მილიონ პოტენციურ იმიგრანტს შეეხება. მათ შორის მათ, ვისაც აშშ-ში მუდმივი ცხოვრების უფლების მიღება სურთ. გამონაკლისი იქნება დიპლომატიური ვიზა.

ამის შესახებ საუბარია Federal Register-ის საიტზე, რომელიც აშშ-ის სამთავრობო უწყებების მიერ წარდგენილი ინიციატივების წინასწარ გამოქვეყნებას ახორციელებს.

სახელმწიფო დეპარტამენტის ასეთი მოთხოვნა მიმართულია იმ ადამიანებისკენ, რომლებიც საიმიგრაციო ვიზებზე განაცხადს გააკეთებენ (დოკუმენტის ტიპი, რომელიც შეიძლება გახდეს პირველი ნაბიჯი მათთვის, ვინც აშშ-ის ტერიტორიაზე მუდმივად ცხოვრებას აპირებს) ასევე იმ პირების მიმართ, რომლებიც აშშ-ში ცხოვრების ნებართვაზე გააკეთებენ განაცხადს (მწვანე ბარათი). ამის გარდა ანალოგიური ღონისძიებების გატარებას აპირებს იმ პირების მიმართაც, რომლებიც განაცხადს ჩვეულებრივ ვიზებზე გააკეთებენ (ფორმა DS-160 და DS-156). გამონაკლისი გათვალისწინებულია დიპლომატებისთვის, ოფიციალური პირებისთვის და სხვა რიგი კატეგორიებისთვის, მაგალითად იმ პაციენტებისთვის, რომელთაც სასწრაფო მკურნალობა სჭირდებათ, ასევე გაცვლით პროგრამაში მონაწილე სტუდენტებისთვის, რომლებიც ქვეყანაში მოკლე ვადით შედიან და განმცხადებლების სხვა კატეგორიებს.

ამ დოკუმენტების გამოქვეყნება მოსალოდნელია 2018 წლის 30 მარტს. ინიციატივის საჯარო განხილვისთვის გამოყოფილია 60 დღე.

სოციალური ქსელების ისტორიის გარდა, სახელმწიფო დეპარტამენტმა შეიძლება მოითხოვის სხვა პლატფორმების ისტორიების, რომელთა ჩამონათვალსაც საკუთარი შეხედულებისამებრ განსაზღვრავს და რომელთა შესახებაც წინასწარ ინფორმაციის გავრცელების ვალდებულება არ აქვს. გარდა ამისა, განახლებულ სავიზო აპლიკაციას დაემატება შეკითხვები ძველი ტელეფონის ნომრის, ელექტრონული ფოსტის მისამართების შესახებ და ა.შ.

ასეთი ღონისძიებების გატარების აუცილებლობას ფედერალური ხელისუფლება ეროვნული უსაფრთხოების ინტერესებით ხსნის. აღნიშნული ნორმები სან ბერნარდინოში 2015 წელს მომხდარი ტერაქტის შემდეგ შემუშავდა, როდესაც ქალი და მამაკაცი შშმ პირების ცენტრში შევარდნენ, 14 ადამიანი მოკლეს და 21 დაჭრეს.

მოგვიანებით პოლიციამ მათი იდენტიფიცირება მოახდინა, ისინი აღმოჩნდნენ 27 წლის ტაშფინ მალიკი და მისი ქმარი 28 წლის საიდ რიზვან ფარუკი. გამოძიებამ დაადგინა, რომ ტერორისტები იყვნენ რადიკალური ისლამის მიმდევრები, ერთ-ერთმა მათგანმა კი ექსტრემალური შინაარსის შეტყობინება სოციალურ ქსელში ფსევდონიმის გამოყენებით დატოვა.