2 მილიარდი დოლარი კვარტალური შემოსავალი - Amazon-ი Apple-ის შემდეგ მეორე ადგილზეა

ეს საინტერესოა - 14:44, 27 Mar, 2018

2385

კომპანია Amazon-მა ონლაინ-გაყიდვების რეკორდი დაამყარა - 2017 წლის მე-4 კვარტალში მისმა მოგებამ 2 მილიარდი დოლარი შეადგინა.

კომპანია, რომელიც 1994 წელს დაარსდა, კაპიტალიზაციის დონით მეორე ადგილზეა Apple-ის შემდეგ და უსწრებს Google-ის მფლობელ კორპორაცია Alphabet-ს. ხოლო მისი დამფუძნებელი და მფლობელი ჯეფ ბეზოსი მსოფლიოში უმდიდრეს ადამიანად ითვლება - მისმა ქონებამ 132 მილიარდ დოლარს გადაჭარბა.

ეს წარმატება მსოფლიოში ინტერნეტგაყიდვების სფეროში Amazon-ის ლიდერობამ გამოიწვია.

აშშ-ში მაგალითად, რომელიც კომპანიისთვის მთავარ ბაზარს წარმოადგენს, ონლაინგაყიდვებში დახარჯული ყოველი დოლარიდან 44 ცენტი Amazon-ზე მოდის. გარდა ვირტუალური გაყიდვებისა, გასულ წელს კომპანიამ Whole Foods-ის სავაჭრო ქსელი 13,7 მილიარდ დოლარად შეიძინა, ხოლო წელს, სიეტლში, Amazon-მა გახსნა სუპერმარკეტი, სადაც არც სალაროა, არც მოლარე და გადახდა მობილური ტელეფონით შეიძლება.

არანაკლებ წარმატებულია Amazon-ი საზღვარგარეთ. გერმანიაში ონლაინგაყიდვებში მისი წილი 25% შეადგენს, დიდ ბრიტანეთში - 19%-ს. ორივეგან კომპანია ასევე ლიდერია ამ სფეროში. იაპონიაში მას მეორე ადგილი უკავია 20.2%-ით.

თუმცა, Amazon-ი არაერთხელ გამხდარა კრიტიკის ობიექტიც, მაგალითად მას ადანაშაულებენ კონკურენციის სფეროში აგრესიული სტრატეგიის გამოყენებაში, რასაც კონკურენტების ჩაძირვა მოჰყვა. Amazon-ი უარყოფით კონტექსტში მოიხსენიება შრომითი ურთიერთობების სფეროში - ესპანეთსა და გერმანიაში კომპანიის თანამშრომლები გაფიცვითაც იმუქრებოდნენ.

შარშან, ოქტომბერში ევროკავშირი განიხილავდა Amazon-ის მიერ გადასახადების გადაუხდელობის საკითხს და მას დაეკისრა 293 მილიონი დოლარის გადახდა მას შემდეგ, რაც ევროკომისიამ დაადგინა, რომ გადასახადების დარიცხვის კუთხით კომპანიამ ლუქსემბურგის ხელისუფლებასთან არასამართლიანი ხელშეკრულება დადო