დასავლეთი რუსეთის წინააღმდეგ - 15 ქვეყანა, საიდანაც რუს დიპლომატებს აძევებენ

მსოფლიო - 18:14, 26 Mar, 2018

2219

რუსი დიპლომატებისთვის დღევანდელი დღე გაძევებით სრულდება. დღეს ცნობილი გახდა, რომ დიდ ბრიტანეთში ყოფილი რუსი ორმაგი აგენტის სერგეი სკრიპალის მოწმვლის გამო, რუს დიპლომატებს 15 ქვეყანა აძევებს - აშშ და 14 ევროპული ქვეყანა. აშშ სიეტლში მდებარე რუსეთის საკონსულოსაც ხურავს.

ქვეყნები, რომლიდანაც რუს დიპლომატებს აძევებენ:

60 დიპლომატს აძევებს აშშ, გერმანია - 4, პოლონეთი - 4, უკრაინა - 13, დანია - 2, საფრანგეთი - 4, ჩეხეთი - 3, ლატვია - 1, ესტონეთი - 1, ლიტვა - 3, იტალია - 2, კანადა - 4, ნიდერლანდები - 2, რუმინეთი -1, ფინეთი -1.

შეგახსენებთ, დიდი ბრიტანეთის ქალაქ სოლსბერიში, ყოფილი რუსი ორმაგი აგენტი სერგეი სკრიპალი და მისი შვილი იულია, 4 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი ამ დრომდე კომატოზურ მდგომარეობაში იმყოფება და გადარჩენისთვის იბრძვის. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."

რუსეთის დაზვერვის ყოფილი თანამშრომლის მოწამვლის საქმეზე ლონდონმა მოსკოვიდან ახსნა-განმარტებები მოითხოვა და 24 საათიანი ვადა მისცა მოსკოვს , თუმცა პასუხი ვერ მიიღო. შედეგად კი ბრიტანეთმა მოსკოვს სანქციები დაუწესა.

ბრიტანეთმა რუსეთის უმაღლეს ხელისუფლებასთან ყველა დონის ურთიერთობა გაწყვიტა.

ამავდროულად, დიდი ბრიტანეთმა ქვეყნიდან 23 რუს დიპლომატი გაძევა. დიდი ბრიტანეთი, რუსული გაზის სხვა მომწოდებლით ჩანაცვლებაზეც იწყებს ზრუნვას.

რაც შეეხება რუსეთის პასუხს, დიდი ბრიტანეთის ქმედების საპასუხოდ, ქვეყნიდან ბრიტანელი დიპლომატები გააძევეს და პერსონა ნონ გრატად გამოაცხადეს.