პუტინი ცრუობს, ეს კარგი გაკვეთილია ტრამპისთვის რუსეთის ხელისუფლების ზნეობის შესაფასებლად

პუტინი ცრუობს, ეს კარგი გაკვეთილია ტრამპისთვის რუსეთის ხელისუფლების ზნეობის შესაფასებლად - "ცივი ომის რაინდი"

მსოფლიო - 16:51, 24 Mar, 2018

2519

აშშ-ის პრეზიდენტმა დონალდ ტრამპმა თავის უახლოეს გარემოცვაში მორიგი გადაადგილება მოახდინა და ეროვნული უსაფრთხოების საკითხებში მრჩევლის თანამდებობაზე "ვაშინგტონელი ქორი", "ცივი ომის რაინდი", გამოცდილი დიპლომატი, კონსერვატორი ჯონ ბოლტონი დანიშნა, რომელიც გამოირჩევა ტრადიციული აგრესიული შეხედულებებით რუსეთის, ირანისა და ჩრდილოეთ კორეასთან ურთიერთობის კუთხით. ტრამპის გარშემო კონსერვატორთა წრე იკვრება - ბოლტონამდე პრეზიდენტმა მაიკ პომპეო სახელმწიფო მდივნის თანამდებობაზე, ხოლო ეკონომიკურ მრჩევლად ლარი კადლოუ დანიშნა.

შესაბამისად, ექსპერტები აშშ-ის საგარეო პოლიტიკის კიდევ უფრო გამკაცრებას მოელიან, თუმცა, იმასაც უსვამენ ხაზს, რომ ტრამპის ბუნებიდან გამომდინარე, საბოლოო გადაწყვეტილებები მან შეიძლება ყველას გაუთვალისწინებლად მიიღონ.

მათი შეფასებით, ბოლტონი, რომელსაც ნამუშევარი აქვს რეიგანთან და ორივე ბუშებთან, ტრამპის სრული ანტიპოდია. თუმცა, როგორც მედია იუწყება, ტრამპი, რომელიც საკმაოდ დიდ დროს ატარებს ტელევიზორთან, Fox News-ზე ბოლტონის გამოსვლებს ინტერესით უყურებდა და რეგულარულად იბარებდა მას თეთრ სახლში.

ტრამპისგან განსხვავებით, ბოლტონი თვლის, რომ რუსეთი აშკარად ჩაერია ამერიკის არჩევნებში.

"ამერიკის კონსტიტუციის შელახვის მცდელობა გაცილებით უარესია, ვიდრე ჩვეულებრივი საიდუმლო ოპერაცია. ეს ფაქტიურად casus belli-ია, ნამდვილი აგრესიული აქტი, რომელსაც ვაშინგტონი არასდროს მოითმენს. იმაზე დაკვირვება, თუ როგორ ცრუობს პუტინი მისი თანდასწრებით, კარგი გაკვეთილია ტრამპისთვის რუსეთის ხელმძღვანელობის ზნეობის შესაფასებლად," - აცხადებს ბოლტონი.

ბოლტონი თვლის, რომ სერგეი სკრიპალის მოწამვლასთან დაკავშირებით, ამერიკის რეაქცია მკვეთრი და საგრძნობი უნდა იყოს. იგი ვაშინგტონს რუსეთის წინააღმდეგ სანქციების კიდევ უფრო გამკაცრებისკენ მოუწოდებს.

მისი ამ პოზიციიდან გამომდინარე, ექსპერტები თვლიან, რომ თეთრ სახლში მოხვედრის შემდეგ ჯონ ბოლტონი ამ შეხედულებებით ეცდება გავლენა მოახდინოს ტრამპის საგარეო პოლიტიკაზე. თუმცა, გასათვალისწინებელია ის ფაქტიც, რომ გამოცდილმა საჯარო მოხელემ კარგად იცის, თუ ვინ არის "თეთრი სახლის მეთაური". მას შემდეგ რაც ტრამპმა მისი დანიშვნის შესახებ განაცხადა, მან კვლავ მიიღო მონაწილეობა Fox News-ის გადაცემაში, მაგრამ საგარეოპოლიტიკურ საკითხებზე პირდაპირი კომენტარებისაგან თავი შეიკავა.

ბოლტონმა პირადი მაგალითიც მოიყვანა. ბუში-უფროსის ადმინისტრაციაში სახელმწიფო მდივან ჯეიმს ბეიკერის მოადგილის პოსტზე მუშაობისას მან უკმაყოფილება გამოთქვა იმის გამო, რომ ბუშმა მისი წინადადება არ გაითვალისწინა, რაზედაც ბეიკერმა მას შემდეგი ფრაზით უპასუხა - "კაცმა, რომელიც აირჩიეს, ამის გაკეთება არ მოინდომა".