დღესასწაული თუში ხალხის უძველეს პროფესიას,- მეცხვარეობას უკავშირდება და გასული საუკუნის 70-იანი წლებიდან, ივლისის ან აგვისტოს თვეში, ყოველწლიურად აღინიშნება.

ფესტივალი "თუშეთობა 2013" კესელოს ციხესთან და ვიზიტორთა ცენტრში გაიმართება. კულტურის სამინისტროს დელეგაცია სხვა მოწვეულ სტუმრებთან და ახმეტის მუნიციპალიტეტის ხელმძღვანელობასთან ერთად, თუშებს დღესასწაულს მიულოცავს, გამოცდილ და ახალგაზრდა მწყემსებს კი საჩუქრებით დააჯილდოვებს. გაიმართება შეჯიბრი მშვილდოსნობაში და დოღში,- გამარჯვებულებს საჩუქრები და პრიზები გადაეცემათ.

ფესტივალის ფარგლებში, დაგეგმილია თუშური სამზარეულოს და ტრადიციული კერძების დეგუსტაცია. ფაცხებში სტუმრებს საშუალება ექნებათ ნახონ და მონაწილეობა მიიღონ ტრადიციულ თუშურ ღონისძიებებში. მოწვეული სტუმრები თუშურ ლუდს, ხინკალს, მწვადს, გუდის ყველსა და კახურ შოთებს დააგემოვნებენ.

დაგეგმილია კონცერტი, რომელშიც მონაწილეობას მიიღებენ ადგილობრივი ფოლკლორული და ქორეოგრაფიული ანსამბლები, - "კესელო"", "ცხრაკარა", "ბახტრიონი" და "თუშეთი".

ფაცხებთან და სცენასთან გამოფენილი იქნება ხალხური რეწვის ნიმუშები და ტრადიციული ყოფა-ცხოვრების ამსახველი ძველებური ნივთები. მოეწყობა თუშეთის კუთხის ამსახველი ძველებური საყოფაცხოვრებო ნივთების გამოფენა-გაყიდვაც.

საღამოს, ფესტივალს დაასრულებს კონცერტი, რომელშიც მონაწილეობას მოწვეული და ადგილობრივი შემსრულებლები მიიღებენ.