პოლონეთის პრეზიდენტი რუსეთში ფეხბურთის მსოფლიო ჩემპიონატს ბოიკოტს უცხადებს

მსოფლიო - 14:00, 20 Mar, 2018

4227

პოლონეთის პრეზიდენტი ანჯეი დუდა ბოიკოტს უცხადებს რუსეთში გასამართ მსოფლიო ჩემპიონატს.

როგორც მისი კანცელარიის ხელმძღვანელმა კშიშტოფ შერსკიმ RMF 24-ის ეთერში განაცხადა, პრეზიდენტი მსოფლიო ჩემპიონატს არ დაესწრება.

პოლონეთის პრეზიდენტმა ვლადიმერ პუტინს არც საპრეზიდენტო არჩევნებში გამარჯვება მიულოცა.

რაც შეეხება მსოფლიო ჩემპიონატისთვის ბოიკოტის გამოცხადებას, ამის მოწოდებით სირიაში მოქმედი უფებადამცველი და ჰუმანიტარული ორგანიზაციები გამოდიან.

შეგახსენებთ, გავრცელდა ინფორმაცია, რომ პოლონეთმა შესაძლოა, დიდ ბრიტანეთს სოლიდარობა გამოუცხადოს და ქვეყნიდან რუსი დიპლომატები გააძევოს.

შეგახსენებთ, დიდი ბრიტანეთის ქალაქ სოლსბერიში, ყოფილი რუსი ორმაგი აგენტი სერგეი სკრიპალი და მისი შვილი იულია, 4 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი ამ დრომდე კომატოზურ მდგომარეობაში იმყოფება და გადარჩენისთვის იბრძვის. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."

რუსეთის დაზვერვის ყოფილი თანამშრომლის მოწამვლის საქმეზე ლონდონმა მოსკოვიდან ახსნა-განმარტებები მოითხოვა და 24 საათიანი ვადა მისცა მოსკოვს , თუმცა პასუხი ვერ მიიღო. შედეგად კი ბრიტანეთმა მოსკოვს სანქციები დაუწესა.

ბრიტანეთმა რუსეთის უმაღლეს ხელისუფლებასთან ყველა დონის ურთიერთობა გაწყვიტა.

ამავდროულად, დიდი ბრიტანეთმა ქვეყნიდან 23 რუს დიპლომატი გაძევა. დიდი ბრიტანეთი, რუსული გაზის სხვა მომწოდებლით ჩანაცვლებაზეც იწყებს ზრუნვას.

რაც შეეხება რუსეთის პასუხს, დიდი ბრიტანეთის ქმედების საპასუხოდ, ქვეყნიდან ბრიტანელი დიპლომატები გააძევეს და პერსონა ნონ გრატად გამოაცხადეს.