რუსეთში საპრეზიდენტო არჩევნები მიმდინარეობს. რუსეთის ტერიტორიაზე 97 ათასი უბანი გაიხსნა. 400 უბანი საზღვარგარეთაა. წელს პირველად რუსეთში ამომრჩევლებს ხმის მიცემის უფლება ფაქტობრივი ადგილსამყოფელის მიხედვით შეუძლიათ.

მოქმედი პრეზიდენტის ვლადიმერ პუტინის, რომელიც ამ პოსტზე კენჭს უკვე მეოთხედ იყრის, გამარჯვებაში ყველა წინასწარ დარწმუნებულია, თუმცა, მას სურს, რომ არჩევნებზე ხალხის მოსვლის პროცენტი დიდი იყოს.

არჩევნებში მონაწილეობის უფლება არ მისცეს ოპოზიციის ლიდერს და პუტინის ყველაზე ძლიერ მოწინააღმდეგეს ალექსეი ნავალნის. ნავალნი რუსეთის საპრეზიდენტო არჩევნებს არ აღიარებს და მოსახლეობას ბოიკოტირებისკენ მოუწოდებს.

არჩევნებზე დაშვებული კანდიდატებიდან არჩევნებში 8 კანდიდატი იბრძოლებს. მათ შორის, რუსეთის კომუნისტური პარტიის კანდიდატი პაველ გრუდინინი, ლიბერალ-დემოკრატიული პარტიის ლიდერი ვლადიმერ ჟირინოვსკი, "იაბლოკოს" დამფუძნებელი გრიგორი იავლინსკი, "სამოქალაქო ინიციტივის" კანდიდატი ქსენია სობჩაკი, "ზრდის პარტიის" ლიდერი ბორის ტიტოვი, "რუსეთის კომუნისტების" ხელმძღვანელი მაქსიმ სურაიკინი და "რუსეთის საერთო სახალხო კავშირის" კანდიდატი" სერგეი ბაბურინი.