"როგორც ჩანს, სკრიპალზე თავდასხმის უკან რუსეთი დგას"

"როგორც ჩანს, სკრიპალზე თავდასხმის უკან რუსეთი დგას" - დონალდ ტრამპი

მსოფლიო - 11:45, 16 Mar, 2018

2107

აშშ-ის პრეზიდენტის, დონალდ ტრამპის თქმით, ყოფილ რუს ორმაგ აგენტზე განხორციელებული ქიმიურ თავდასხმის უკან, „როგორც ჩანს რუსეთი დგას.“

„ვესაუბრე ბრიტანეთის პრემიერ-მინისტრს და ჩვენ საკმაოდ ღრმა მოლაპარაკებებს ვაწარმოებთ. ძალიან სამწუხარო მდგომარეობაა. როგორც ჩანს, სკრიპალზე თავდასხმის უკან რუსები დგანან და ჩვენ ამას ძალიან სერიოზულად ვიღებთ. ასე ვფიქრობ მეც და სხვებიც“ განაცხადა ტრამპმა.

გუშინ, დიდი ბრიტანეთის, აშშ-ის, საფრანგეთისა და გერმანიის ლიდერებმა ერთობლივი განცხადება გაავრცელეს, რომლითაც სერგეი სკრიპალზე ქიმიურ თავდასხმას დაგმეს და რუსეთს შესაბამისი პასუხისმგებლობის აღებისკენ მოუწოდეს.

შეგახსენებთ, ყოფილი რუსი ორმაგი აგენტი სერგეი სკრიპალი და მისი შვილი იულია, 4 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი ამ დრომდე კომატოზურ მდგომარეობაში იმყოფება და გადარჩენისთვის იბრძვის. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."

რუსეთის დაზვერვის ყოფილი თანამშრომლის მოწამვლის საქმეზე ლონდონმა მოსკოვიდან ახსნა-განმარტებები მოითხოვა და 24 საათიანი ვადა მისცა მოსკოვს , თუმცა პასუხი ვერ მიიღო. შედეგად კი ბრიტანეთმა მოსკოვს სანქციები დაუწესა.

ბრიტანეთმა რუსეთის უმაღლეს ხელისუფლებასთან ყველა დონის ურთიერთობა გაწყვიტა.

ამავდროულად, დიდი ბრიტანეთი ქვეყნიდან 23 რუს დიპლომატს აძევებს. ქვეყნის დასატოვებლად მათ პრემიერმა ერთი კვირა მისცა. გაიყინება რუსული საბანკო ანგარიშები. დიდი ბრიტანეთი, რუსული გაზის სხვა მომწოდებლით ჩანაცვლებაზეც იწყებს ზრუნვას.

რაც შეეხება რუსეთის პასუხს, რუსეთის საგარეო საქმეთა მინისტროს სერგეი ლავროვის თქმით, ლონდონის ქმედებების საპასუხოდ, რუსეთიდან ბრიტანელ დიპლომატებს გააძევებენ, თანაც "მალე." მისივე თქმით, საპასუხო ქმედებები ამით არ შემოიფარგლება და ამის შესახებ უახლოეს მომავალაში ბრიტანელებს აცნობებენ.