მიხეილ სააკაშვილის ადვოკატებმა სტრასბურგის სასამართლოში სარჩელი შეიტანეს

მსოფლიო - 16:39, 15 Mar, 2018

2128

საქართველოს მესამე პრეზიდენტის მიხეილ სააკაშვილის ადვოკატებმა უკრაინის სახელისუფლო ორგანოების წინააღმდეგ ევროპის ადამიანის უფლებათა სასამართლოში სარჩელი შეიტანეს. სარჩელში საუბარია 2018 წლის 12 თებერვალს მიხეილ სააკაშვილის უკანონო დაკავებისა და პოლონეთში უკანომო რეადმისიის დროს, მის მიმართ ადამიანის უფლებების კუთხით ჩადენილ დარღვევებსა და უკრაინის პრეზიდენტის პეტრო პოროშენკოს მიერ მიხეილ სააკაშვილისთვის უკრაინის მოქალაქეობის უკანონო ჩამორთმევის თაობაზე.

სააკაშვილის ადვოკატი რუსლან ჩერნოლუცკი ასევე აცხადებს, რომ გასაჩივრებულია საქართველოს მესამე პრეზიდენტის რამდენიმე უკანონო დაკავება, რომელიც 2017 წლის დეკემბრის შემდეგ განხორციელდა.

"გარდა ამისა, უკრაინის გენერალური პროკურორი იური ლუცენკო, გამოიყენა რა მისი სამსახურეობრივი მდგომარეობა, ცდილობდა საზოგადოებაში შეექმნა უარყოფითი განწყობა ბატონი მიხეილ სააკაშვილის მიმართ. ამასთან, ხელისუფლების მიერ განხორციელებული უკანონო ქმედებების შედეგად სააკაშვილს ფაქტიურად წაართვა უკრაინის სასამართლოებში საკუთარი ინტერესების დაცვის უფლება," - აცხადებს ჩერნოლუცკი.

მან ასევე დასძინა, რომ სტრასბურგში წარდგენილ სარჩელში შეტანილია სხვა გარემოებებიც, რაც იმის საფუძველს იძლევა, რომ ევროპის ადამიანის უფლებათა სასამართლო მათ განიხილავს.