დიდი ბრიტანეთის სანქციების საპასუხოდ, რუსეთი ქვეყნიდან გააძევებს ბრიტანელ დიპლომატებს.

ამის შესახებ რუსეთის საგარეო საქმეთა მინისტრმა სერგეი ლავროვმა რამდენიმე წუთის წინ განაცხადა ფორუმზე - "რუსეთი შესაძლებლობების ქვეყანა."

კითხვაზე, მზად არის თუ არა რუსეთი, ბრიტანეთის ქმედების საპასუხოდ, ბრიტანელი დიპლომატები გააძევის, ლავროვმა უპასუხა - "აუცილებლად."

ვადებზე საუბრისას კი განაცხადა, რომ ეს „მალე“ მოხდება.

მისივე თქმით, საპასუხო ქმედებები ამით არ შემოიფარგლება და ამის შესახებ უახლოეს მომავალაში ბრიტანელებს აცნობებენ.

შეგახსენებთ, დიდი ბრიტანეთში ყოფილი რუსი ორმაგი აგენტის მოწამვლის შემდეგ ბრიტანეთი რუსეთის უმაღლეს ხელისუფლებასთან ყველა დონის ურთიერთობას წყვეტს.

ამავდროულად, დიდი ბრიტანეთი ქვეყნიდან 23 რუს დიპლომატს გააძევებს. გაიყინება რუსული საბანკო ანგარიშები.

"ეს იქნება ყველაზე დიდი გაძევება ბოლო 30 წლის განმავლობაში. ეს პირველი შემთხვევა არ არის, როდესაც რუსეთი ჩვენი ქვეყნის წინააღმდეგ მოქმედებს.

ჩვენ ვიწყებთ დაუყოვნებლივ მოქმედებას დიდ ბრიტანეთში რუსული ჯაშუშური ქსელის აღმოსაფხვრელად" - განაცხადა მეიმ პარლამენტში.

შეგახსენებთ, ყოფილი რუსი ორმაგი აგენტი სერგეი სკრიპალი და მისი შვილი იულია, 4 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი კომატოზურ მდგომარეობაში იმყოფება და გადარჩენისთვის იბრძვის. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."