გაერო-ს უშიშროების საბჭოს სხდომაზე მთავარი განსახილველი საკითხი დიდი ბრიტანეთისა და რუსეთის ურთიერთობა გახლდათ. რუსეთის წარმომადგენელმა გაერო-ში ვასილი ნებეზნიამ განაცხადა, რიმ დიდ ბრიტანეთში მომხდარი რუსეთთან კავშირში არ არის:

„ჩვენ მოვითხოვთ რუსეთის კვალის არსებობის მტკიცებულებების წარდგენას. ბრიტანეთის პრემიერმინისტრმა განაცხადა, რომ რუსეთი კავშირშია სოლსბერიში ტოქსიკური ნივთიერების გამოყენებასთან და 24 საათიანი ვადა მოგვცა იმისათვის, რომ დავადასტუროთ ამ დანაშაულის ჩადენა. ჩვენ არ ვსაუბრობთ ულტიმატუმების ენით და არ დავუშვებთ ჩვენს მიმართ მსგავსი ტონით საუბარს, მაგრამ ჩვენ ზრდილობიანები ვართ და საგარეო უწყებას უკვე გავუგზავნე შეტყობინება იმის შესახებ,რ ომ ამ ინციდენტთან კავშირი არ გვაქვს“, - განაცხადა ვასილი ნებეზნიამ.

შეგახსენებთ, დიდი ბრიტანეთში ყოფილი რუსი ორმაგი აგენტის მოწამვლის შემდეგ ბრიტანეთი რუსეთის უმაღლეს ხელისუფლებასთან ყველა დონის ურთიერთობას წყვეტს. ამავდროულად, დიდი ბრიტანეთი ქვეყნიდან 23 რუს დიპლომატს გააძევებს. გაიყინება რუსული საბანკო ანგარიშები.

"ეს იქნება ყველაზე დიდი გაძევება ბოლო 30 წლის განმავლობაში. ეს პირველი შემთხვევა არ არის, როდესაც რუსეთი ჩვენი ქვეყნის წინააღმდეგ მოქმედებს. ჩვენ ვიწყებთ დაუყოვნებლივ მოქმედებას დიდ ბრიტანეთში რუსული ჯაშუშური ქსელის აღმოსაფხვრელად" - განაცხადა მეიმ პარლამენტში.

შეგახსენებთ, ყოფილი რუსი ორმაგი აგენტი სერგეი სკრიპალი და მისი შვილი იულია, 6 მარტს მოწამლეს. მათ ერთ-ერთ სავაჭრო ცენტრში გონება დაკარგეს. მამა-შვილი კომატოზურ მდგომარეობაში იმყოფება და გადარჩენისთვის იბრძვის. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი."