ფისტა და სუფრის ყურძენი - პრემიერმა სოფლის მეურნეობაში დაგეგმილ სიახლეებზე ისაუბრა

ბიზნესი & ეკონომიკა - 12:07, 14 Mar, 2018

3056

გიორგი კვირიკაშვილმა მთავრობის სხდომაზე საქართველოში სახილე ჯიშების განვითარების შესახებ ისაუბრა და აღნიშნა, რომ აღნიშნული პროექტი უკვე სამი წერლია წარმატებით ხორციელდება. პრემიერის თქმით ხდება ორი ახალი კულტურის დამატებაც ეს არის ყურძნის ჯიშები და ასევე, ფისტას კულტურა:

„მოგეხსენებათ, რომ უკვე 3 წელია წარმატებით ხორციელდება პროექტი „დანერგე მომავალი“. ეს გახლავთ მაღალპროდუქტიული სახილე ჯიშების განვითარება ქვეყანაში. უკვე გვაქვს ძალიან მნიშვნელოვანი შედეგი - საქართველოში 4 700 ჰექტარზე გაშენდა ახალი ბაღები.

სახელმწიფო აფინანსებს 70 %-ს ნერგების საფასურს და ასევე, წვეთოვან სარწყავ სისტემაზე არის 50%-იანი გრანტი გათვალისწინებული. დამეთანხმებით, რომ ეს არის უდიდესი შესაძლებლობა თითოეული იმ ადამიანისთვის, რომელიც სოფლის მეურნეობაშია ჩართული და ამ მიმართულებით ჩვენ ვამატებთ ორ ახალ კულტურას : სუფრის ყურძნის, წარმოებას - ხაზს ვუსვამ, ეს არ არის ღვინისთვის განკუთვნილი ჯიშები, ეს არის სუფრის ყურძნის ჯიშები და ასევე, ფისტას კულტურას, რომელზეც ძალიან დიდი მოთხოვნაა დღეს მსოფლიოში, საქართველოში კი ძალიან კარგი შესაძლებლობაა ფისტას წარმოების.

ასევე, მოგეხსენებათ, რომ სამწუხაროდ ქვეყანაში, რომელიც არის უძველესი ღვინის კულტურის ქვეყანა, სუფრის ყურძენი დღეს, თითქმის, მთლიანად იმპორტით შემოდის საქართველოში.

მხოლოდ ბოლო პერიოდში დაიწყო სუფრის ყურძნის ჯიშების წარმოება და ვფიქრობთ, რომ ამ მიმართულებით თანადაფინანსება იქნება ძალიან მნიშვნელოვანი - ქვეყანაში იმპორტის ჩანაცვლებისა და რა თქმა უნდა, ადგილობრივი სასოფლო სამეურნეო პოტენციალის გასავითარებლად.“- განაცხადა პრემიერმა.