ვლადიმერ ჯანჯღავა: სალაყაიას მიერ გათავისუფლებული ყველა თანამშრომელი უსიტყვოდ იქნება აღდგენილი სამსახურში

ბიზნესი & ეკონომიკა - 14:42, 13 Mar, 2018

2080

კომპანია „ბადაგონის“ ინვესტორი ვლადიმერ ჯანჯღავა საწარმოს ყველა თანამშრომელს მიმართავს, კრიზისიდან გამოსვლის გეგმას სთავაზობს და აცხადებს, რომ „ბადაგონი“ დღეს ნამდვილად გადასარჩენია და სალაყაიას მმართველობისგანაა გადასარჩენი: “ჩვენი კრიზისიდან გამოსვლის გეგმა არ გულისხმობს ქარხნის ალყაშემორტყმულ ტერიტორიაზე ცხოვრებას, და ყველას დარწმუნებას, რომ ირგვლივ ყველა მტერია, ხოლო ერთადერთი მხსნელი ბატონი სალაყაიაა. ზუსტად ასე ხდება ახლა. გარწმუნებთ, ყველაფერი სხვაგვარად იქნება.

ჩვენ ერთად გადავარჩენთ „ბადაგონს“! - აცხადებს ვლადიმერ ჯანჯღავა.

„ბადაგონის“ ამჟამინდელმა მმართველმა გიორგი სალაყაიამ რამდენიმე დღის წინ საწარმოს თბილისის ოფისის მუშაობა შეაჩერა და განაცხადა, რომ კომპანია კრიზისული მართვის რეჟიმში გადაიყვანა. მისი მმართველობის ბოლო პერიოდში საწარმომ დაკარგა უმსხვილესი კონტრაქტორი ორგანიზაცია, რომელიც აწარმოებდა „ბადაგონის“ ღვინის ექსპორტს ჩინეთში და ამასთან ერთად, რუსეთის მთავარმა დისტრიბუტორმა უარი განაცხადა კონტრაქტით გათვალისწინებულ ვალდებულებებზე.

ვლადიმერ ჯანჯღავა „ბადაგონის“ ყველა თანამშრომელს შექმნილი კრიზისული ვითარებიდან ერთად გამოსვლას სთავაზობს: „სამწუხაროდ, გიორგი სალაყაია, რომელსაც მე საწარმოს მართვის სრული სადავეები ჩავაბარე, მიმალავდა საქმიანობის შესახებ დეტალურ ინფორმაციას. დღეს არსებული ვითარების ზედაპირული ანალიზიც კი ცხადყოფს, რომ „ბადაგონში“ უმძიმესი ფინანსური ვითარებაა.

მე ვიცი, რომ ქარხანაში იყო რთული პერიოდები, როდესაც თანამშრომლები ანაზრაურებას დროულად ვერ იღებდნენ. იმის მიუხედავად, რომ საწარმო მოგებიანი არ იყო, მე ვახერხებდი თანხა ყოველთვის გამომენახა და ხელფასები გამესტუმრებინა.

ამ დროს კი ბატონი სალაყაია არაფერზე ამბობდა უარს, თავს არაფრით იზღუდავდა... ფუფუნებაში ცხოვრობდა, უძრავ ქონებას აგროვებდა და სახლებს იშენებდა“ - საწარმოს ინვესტორი თხოვნით მიმართავს ყველა თანამშრომელს, რომ არ წამოეგონ სალაყაიას პროვოკაციას და იფიქრონ მომავალზე, ქარხნის გადარჩენაზე: „ნუ წამოეგებით სალაყაიასა და მისი თანამზრახველების შანტაჟს. ყველა აქამდე გათავისუფლებული თანამშრომელი ან ისინი, ვისაც სალაყაია ჩვენი სასამართლო განხილვის დროს გაათავისუფლებს, უსიტყვოდ იქნებიან აღდგენილი სამსახურში“ - აცხადებს ვლადიმერ ჯანჯღავა.